भांगरभूंय | प्रतिनिधी
पणजीः सप्टेंबर म्हयन्यांत गोंयांत सरासरी परस चड पावस पडपाची शक्यताय हवामान खात्यान उक्तायिल्ली. पूण सप्टेंबराच्या पयल्या 19 दिसांनी राज्यांत फक्त 4 इंच पावस पडला. अंदूं 1 जून ते 19 सप्टेंबर ह्या काळांत सरासरी 118.03 इंच पावस पडला. फाटल्या वर्सा ह्याच काळांत 165.85 इंच पावस पडला. फुडल्या सप्तका खातीर राज्यांत ल्हान प्रमाणांत पावस पडपाची शक्यताय खात्यान उक्तायल्या.
शुक्रारा राज्यांत हवामान ढगाळ आशिल्लें. दनपारां कांय वेळ अदीं मदीं पावसाची नोंद जाल्ली. 24 वरांत राज्यांत फक्त 2.7 मिमी. तावस पडला. पावसाच्या उणावाक लागून चडांत चड तापमान मात्शें वाडलें.
पणजे चडांत चड 30.4 अंश सेल्सियस आनी उण्यांत उणें 24.5 अंश सेल्सियस नोंद जाला. मुरगांवां चडांत चड तापमान 28.6 अंश आनी उण्यांत उणें 24.8 अंश सेल्सियस उरलें. फुडले पांच दीस राज्यांत चडांत चड तापमान 30 आनी उण्यांत उणें 24 डिग्री सेल्सियस उरपाची शक्यताय आसा.
1 जून ते 19 सप्टेंबर ह्या काळांत सांग्यां 155.43 इंच, धारबांदोड्यां 154.77 इंच, वाळपय 150.42 इंच, केप्यांं 142.77 इंच, फोंड्यां 126.62 इंच आनी सांखळी 123.18 इंच पावसाची नोंद जाल्या. 20 ते 23 सप्टेंबर ह्या काळांत गोंयांत वाऱ्याचो वेग वराक 45 ते 65 किमी. आसतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
