भांगरभूंय | प्रतिनिधी
‘मड्यांची सोसायटी’ आनी ‘म्हजें रायबन’ पुस्तकाचें लोकार्पण
भांगरभूंय । प्रतिनिधी
पणजी : भारताची लोकशाय नेपाळ, श्रीलंका, बांगलादेश ह्या देशां भशेन लेचीपेची ना, ती अमेरिकेच्या लोकशाये भशेन घटमूट आसा. हाका लागून नेपाळ, श्रीलंके भशेन उद्रेक जावप शक्य नासलें तरीय गोंयांत 2027 त लोकशाय मार्गान परिवर्तन हें अटळ आसा, अशें उद्देगपती अवधूतबाब तिंबलो हांणी म्हणलां. अरविंद भाटीकार हांच्या ‘मड्यांची सोसायटी’ आनी स्नेहलता भाटीकार हांच्या ‘म्हजें रायबन’ पुस्तकाच्या लोकार्पण सुवाळ्याक अध्यक्ष ह्या नात्यान ते उलयताले. ह्या वेळार स्नेहलता भाटीकार हांच्या ‘सुकणींच सुकणीं’ ह्या अणकारीत पुस्तकाचें लेगीत लोकार्पण जालें.
ज्ञानपीठ पुरस्कार जैतीवंत साहित्यीक दामोदर मावजो हे मुखेल सोयरे जाल्यार प्रा. उर्वशी नायक मानाचे सोयरे म्हूण कार्यावळीक हाजीर आशिल्ले.
तंत्रज्ञानाचो वापर आयज व्हड प्रमाणांत जायत आसा. डिजिटल तंत्रज्ञानाक लागून इंग्लंडा सारक्या देशांत भ्रश्टाचार आनी गुन्यांवाचें प्रमाण उणें जालां. तंत्रज्ञानाक लागून भ्रश्टाचार उणो जाता आनी तो जावपाक लागला. तरेकवार कारणांक लागून राज्या वयले रीण वाडत चल्लां. सध्या गोंयाचेर 40 हजार कोटींचें रीण आसा. हें रीण 7.5 टक्के कळंतरान फारीक करचें पडटा. बेजापसालदार फुडारी, बेजापसालदार धोरणां हाका लागून भ्रश्टाचार वाडत आसा. अत्याचार, भ्रश्टाचार आनी अन्याया आड कांयच करी नाशिल्ल्यांचो उल्लेख भाटीकार हांणी ‘मड्यांची सोसायटी’ असो केला. हांकां ‘भ्रश्ट मडीं’ अशें म्हणप समर्पक थारतलें, अशें ह्या वेळार अवधूतबाब तिंबलो हांणी सांगलें.
अरविंद भाटीकार हांची कादंबरी ही सत्य स्थितीचेर आदारीत आसा. वाडटो भ्रश्टाचार वा निश्क्रीय समाजा विशीं भाटीकार हांचे मदीं असंतोश खदखदता. हो असंतोश ‘मड्यांची सोसायटी’ कादंबरींतल्यान व्यक्त जाला, अशें दामोदर मावजो हांणी म्हणलें. मुखेल सोयरे ह्या नात्यान तांचें भाशण जालें.
उर्वशी नायक हांणी तिनूय पुस्तकांची म्हायती भाशणांतल्यान दिली. ‘मड्यांची सोसायटी’ ही कादंबरी सत्य स्थितीचेर आदारीत आसा. हे कादंबरींत एकं तरेचो थ्रील आसा, अशें तांणी सांगलें.
स्नेहलता भाटीकार हांच्या ‘म्हजें रायबन’ पुस्तकांतल्यान रायबंदरचो इतिहास तशेंच भुगोल कळपाक मजत जाता. स्नेहलता भाटीकार हांचे नातीन इंग्लिशींतल्यान ‘बर्डस ऑफ फेदर’ हें पुस्तक बरयलां. ह्या पुस्तकाचो कोंकणी अणकार म्हणल्यार ‘सुकणींच सुकणीं’ हें पुस्तक. स्नेहलताबायन आपले नातीच्या इंग्लिश पुस्तकाचो कोंकणींतल्यान अणकार केला, अशें उर्वशी नायक हांणी सांगलें.
पुस्तकाचे लेखक अरविंद भाटीकार आनी स्नेहलता भाटीकार हांणी मनोगत उक्तायलें. भ्रश्टाचार, अन्याय हांचे आड कितेंच उलय नाशिल्ले आनी कसलीच कृती करी नाशिल्ले खूबशे लोक आसात. ते लोक म्हणल्यार जित्या मड्या सारके आसात. ह्या लोकांचेर आदारीत कादंबरी आशिल्ल्यान ‘मड्यांची सोसायटी’ हें नांव दिलां, अशें तांणी सांगलें.
स्नेहलता भाटीकार हांणी रायबंदर तशेंच आपले नातीच्यो यादी सांगल्यो. मेघना कापडी हिणें सूत्रनिवेदन केलें. दिनेश मणेरकार हांणी येवकार दिलो. श्रेया बोरकार हाणी उपकाराचें उलोवप केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
