भांगरभूंय | प्रतिनिधी
30 सप्टेंबराक फोंड्यां पुरस्कार भेटवण सुवाळो
भांगरभूंय । प्रतिनिधी
मडगांव : कोंकणी भाशा मंडळान 2025 चे वर्सुकी पुरस्कार जाहीर केल्यात. पुरस्कार भेटोवपाचो सुवाळो 30 सप्टेंबराक सांजेच्या 4 वरांचेर फोंडेंच्या राजीव कलामंदिरांत जातलो.
कोंकणी भाशा मंडळान आयोजीत केल्ले पत्रकार परिशदेंत अध्यक्ष रत्नमाला दिवकार हांणी हे पुरस्कार जाहीर केले. ह्या वेळार सचीव मंगलदास भट हाजीर आशिल्ले. कोंकणी भाशा मंडळाच्या 63 व्या वर्धापन दिसा हे पुरस्कार भेटयतले.
कोंकणी भाशा मंडळाचे पुरस्कार फुडें दिल्ले प्रमाण आसात. कोंकणी भाशा मंडळ पुरस्कृत कोंकणी सेवा पुरस्कार शिवनाथ नागेशकार आनी उल्हास पै भाटीकार हांकां मेळ्ळा. सेराफीन कॉता पुरस्कृत फेलिस्यू कार्दोज यादस्तीक शिक्षक पुरस्कार एच. मनोज आनी विजय सरदेसाय पुरस्कृत माधवी सरदेसाय यादस्तीक शिक्षक पुरस्कार डॉ. प्रकाश पर्येकार हांकां जाहीर जाला.
दिनेश मणेरकार पुरस्कृत चंद्रकांत केणी यादस्तीक स्तंभलेखन पुरस्कार सखाराम बोरकार हांकां जाल्यार लिगोरियो फुर्तादो ट्रस्ट पत्रकारिता पुरस्कार डॅनियल डिसोझा हांकां जाहीर जाला.
विन्सी क्वाद्रुश पुरस्कृत जुझे पिएदाद यादस्तीक कार्यकर्तो पुरस्कार प्रसाद पांगम आनी फ्रान्सीस फर्नांडीस हांकां मेळ्ळा. फादर मॉरेन डिसोझा यादस्तीक युवा साहित्य पुरस्कार ग्लिनीस डायस, उल्हास ज्युवेलर्स पुरस्कृत उल्हास आनी मिता वेर्लेंकार युवा उद्देजिका पुरस्कार व्हॅनीस आल्मेदा हांकां फावो जाला.
बालसाहित्य पुरस्कारा खातीर योग्य पुस्तकां नाशिल्ल्यान परिक्षक मंडळान नांव सुचोवंक ना. श्रीधर कामत इश्ट परिवार पुरस्कृत साहित्य पुरस्कार अरमांड फर्नांडीस हांच्या ‘पुला पडतडी’ ह्या पुस्तका खातीर दिला.
उदय देशप्रभू हांच्या ‘संघर्शकाणी’ ह्या चरित्र पुस्तकाक रॉक बारेटो साहित्य पुरस्कार तशेंच कोंकणी भाशा मंडळ पुरस्कृत रमेश वेळुस्कार साहित्य पुरस्कार चेतन आचार्य हांच्या ‘यादींचो गांव ह्या पुस्तकाक मेळ्ळा.
दिनेश मणेरकार पुरस्कृत रामनाथ मणेरकार यादस्तीक अणकार पुरस्कार शैलेंद्र मेहता हांणी अणकारीत केल्ल्या ‘मुंबयचो वेपारी’ ह्या पुस्तकाक जाहीर जाला.
2025 च्या पुरस्कारां खातीर फुडें दिल्ल्या मानेस्तांचो परिक्षक मंडळाचेर आस्पाव आशिल्लो. तातूंत सेवा पुरस्कार- कमलाकर म्हाळशी, वसंत भगवंत सावंत. डॉ. नारायण देसाय. पत्रकारिता पुरस्कार- विन्सी क्वाद्रुश, दिलीप बोरकार, प्रमोद आचार्य. शिक्षक पुरस्कार- काश्मिरी पावसकार, अनंत अग्नी, डॉ. भूषण भावे, दिलीप नायक, सुदेश नायक आनी सुनिता काणेकार. कोंकणी कार्यकर्ता पुरस्कार- प्रशांत नायक, सेराफीन कॉता, चेतन आचार्य. साहित्य पुरस्कार- डॉ. किरण बुडकुले, प्रशांती तळपणकार, डॅनियल वाझ. युवा साहित्य पुरस्कार- अंजू साखरदांडे, अनंत अग्नी, फा. लुईस. बालसाहित्य पुरस्कार- नयना आडारकार, हर्षा शेट्ये, योगिनी आचार्य. युवा उद्देजक पुरस्कार- राजेश प्रभू, पराग लोलयेंकार, राधाकांत दिवकार हांणी परिक्षण केलें.
वर्धापन दिसाची पुराय कार्यावळ आनी पुरस्कार जैतवंतांची वळेरी कोंकणी भवन मडगांवां आयोजीत केल्ले पत्रकार परिशदेंत जाहीर केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
