भांगरभूंय | प्रतिनिधी
पणजी : पणजे स्मार्ट सिटी उपरांत पुराय गोंयभर कदंबाच्यो स्मार्ट ईव्ही बशी धांवतल्यो. ‘प्रधानमंत्री- ई बस सेवा’ हे येवजणे खाला गोंय सरकारान केंद्र सराकारा कडेन 100 बशींची मागणी केल्या. ह्यो शंबर बशी पणजी आनी मडगांव शारांक गोंयच्या ल्हान शारांत आनी गांवगिऱ्या वाठारांक जोडटल्यो, अशी म्हायती कदंब येरादारी म्हामंडळाचे वेवस्थापकी संचालक रोहन कासकार हांणी दिली.
शार वेव्हार आनी गृह निर्माण मंत्रालयान शार येरादारीक उर्बा दिवपाच्या हेतान प्रधानमंत्री ई बस सेवा ही केंद्रीय येवजण जाहीर केल्ली. हे येवजणेच्या मार्गदर्शक तत्वां प्रमाण गोंयच्या पणजी शाराचो 5 लाखां खाला आशिल्ल्या लोकसंख्या विभागांत पात्र शारांचे वळेरेंत आस्पाव जाला. हे येवजणेचो राज्यभर विस्तार करपा खातीर शार उदरगत खातें शार गतिशिलता क्षेत्र अधिसुचीत करून ईव्ही बशी वैधानीक शार, जनगनणना शार आनी शारीकरणच्या मार्गार आशिल्ल्या वाठाराक जोडटले.
उत्तर गोंय गतिशिलता क्षेत्र आनी दक्षीण गोंय गतिशिलता क्षेत्र अशी विभागणी करून शार उदरगत खात्यान हे ईव्ही बशीचे मार्ग थारावपा खातीर, संबंदीत सुविधांचे उदरगती खातीर आनी प्रधानमंत्री ई-बस सेवा येवजणेच्यो बसी चालीक लावपा खातीर शार उदरगत खात्यान अधिसुचोवणी उजावाडाक हाडल्या. शार उदतरगत खातें हें नोडल एजन्सी आसतली आनी कदंब येरादारी म्हामंडळ शार उदरगत खात्यान अधिसुचीत केल्ल्या क्षेत्रांत येवजणेची अंमलबजावणी करतले.
हे विशीं अदीक म्हायती दितना कदंब येरादारी म्हामंडळाचे वेवस्थापकी संचालक कासकार हांणी सांगलें, हे येवजणे खाला कदंब येरादारी म्हामंडळान केंद्रीय शार वेव्हार आनी गृह निर्माण मंत्रालया कडेन 100 बशी मागल्यात.
हे येवजणे खाला उत्तर गोंयांत पणजी आनी दक्षीण गोंयांत मडगांव हीं केंद्रां थारयल्यांत. ह्या दोनूय शारांतल्यान ‘शार केंद्रीत जोडणी’ राज्यांतल्या अंतर्गत आनी शार वाठारांत ईव्ही बशी वरवीं मेळटली. हे खातीर 100 मदल्यो 50 बशी उत्तर गोंयांत जाल्यार 50 बशी दक्षीण गोंयांत तैनात करतले, अशें कासकार हांणी म्हणलें.
हे विशींची सगळी टेंडर प्रक्रिया मंत्रालय करतलें आनी मंत्रालयूच विकती घेवन त्यो बशी आमकां दितले. शार उदरगत खातें हें नोडल एजन्सी आसा जाल्यार कदंब येरादारी म्हामंडळ अंमलबजावी एजन्सी आसा. स्मार्ट सिटी भशेनूच ह्यो बशी पणजी आनी मडगांव शारांक गोंयच्या वेगवेगळ्या गांवांक आनी शारांक जोडटले, अशी म्हायती कासकार हांणी दिली. अधिसुचोवणेंत दिल्ले म्हायती प्रमाण पणजी सावन ह्यो बशी 38 मार्गांचेर धांवतल्यो आनी मडगांव सावन ह्यो बशी 25 मार्गांचेर धांवतल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
