भांगरभूंय | प्रतिनिधी
मुख्यमंत्र्याचे आस्वासन : आंदोलनाक लागून पणजी येरादारी कोंयडी
भांगरभूंय । प्रतिनिधी
पणजीः राजधानी पणजी शार शुक्रारा पेटून उठलें. ‘समाजवावुरपी रामा काणकोणकाराचेर हल्लो करपी हो मास्टरमायंड कोण?’ हें मुख्यमंत्री डॉ. प्रमोद सावंत हांकां विचारपा खातीर समाजीक वावुरपी आनी विरोधी आमदारांनी पणजे शारांत आंदोलन केलें. दयानंद बांदोडकार मार्ग आडावन दवरिल्ल्या कारणान पुराय पणजे शारांत येरादीरीची कोंयडी जाली. उपरांत डॉ. सावंत हांणी आंदोलकांच्या शिश्टमंडळाची भेट घेवन मास्टरमायंडाक सोदून काडपाचें आश्वासन दितकत परिस्थिती शांत जाली.
काणकोणकार हांचेर दिसा उजावाडा जाल्ल्या हल्ल्याचो निशेध करपाक आझाद मैदानाचेर समाज वावुरप्यांनी सभा आपयिल्ली. हे सभे वेळार व्हडा संख्येन समाज वावुरपी, विरोधी पक्ष फुडारी युरी आलेमाव, गोवा फॉरर्वडचे आमदार विजय सरदेसाय, आम आदमी पक्षाचे आमदार वेन्झी व्हिएगस, रेव्ह्युलेशनरी गोवन्स पक्षाचे आमदार विरेश बोरकार, दक्षीण गोंय खासदार विरियातो फर्नांडीस आनी हेर राजकी पक्षाचे फुडारी हाजीर आशिल्ले.
आझाद मैदाना वयली जाहीर सभा सोपलें उपरांत ह्या हल्ल्याची सुपारी दिवपी मास्टर मायंड कोण हें पुलीस महासंचालकांक विचारपाक आंदोलकांनी पुलीस मुख्यालया कडेन वचून घेराव घालो. पुलीस महासंचालक मेळना म्हूण तांणी आपलो मोर्चो मुख्यमंत्र्याचो बंगल्या वटेन वळयलो. पूण पुलिसांनी तांका थंयच आडयले.
मात आंदोलक विरोधी आमदारांच्या बळग्यार फुडे सरले आनी पणजे चर्च स्केअराचेर वचून रस्तो आडयलो आनी मुख्यमंत्र्या आड घोशणा दिवपाक सुरवात केली. मुख्यमंत्र्या कडल्यान कसलोच प्रतिसाद मेळूंक नाशिल्ल्यान तांणी आपलो मोर्चा दयानंद बांदोडकार मार्गाचेर वळयलो. थंयसर पोरणें सचिवालय ते पाटो पुला मजगतीचो मुखेल रस्तो आडोवन दवरलो आनी मुख्यमंत्र्यांच्या भेटीची मागणी केली.
उपरांत पुलीस अधिक्षक राहूल गुप्ता घडणूक थळाचेर पावले आनी परिस्थिती नियंत्रणात हाडपाचे यत्न केले. मुख्यमंत्री आंदोलकांची भेट घेवपाक तयार आसा अशें सांगून सगळे आंदोलक मुख्यमंत्र्यांच्या बंगल्यार पावले. पूण बंगल्यार पावतकत फकत आंदोलकांच्या एका शिश्टमंडळाक भितर धाडपाक मुख्यमंत्र्यान सांगले. पूण मुख्यमंत्र्यान सगळ्या आंदोलका मुखार येवन जाप दिवची अशी मागणी आंदोलकांनी धरली. बोवाळा उपरांत आमदार आनी आंदोलकांचे शिष्टमंडळ मुख्यमंत्र्यांक वचून मेळ्ळे.
बसके उपरांत म्हायती दितना शिश्टमंडळान सांगलें, आमची भेट घेतले उपरांत मुख्यमंत्री गोंय वैजकी महाविद्यालयात वचून रामा काणकोणकार हांच्या भलायकेची खबर घेतले. ह्या हल्ल्यात कोण मास्टर मायंड आसा ताका दोन दिसा भितर धरपाचे आश्वासन मुख्यमंत्र्यान दिलां. तशेंच पुलीस अधिक्षक राहूल गुप्ता हांणी वेळ मागला आनी ह्या प्रकरणा विशीं मिडीया वरवीं दर 24 वरां भितर अपडेट दिवपाचे आश्वासन दिला, अशें शिश्टमंडळान सांगलें.
गँगवाॅर काबार करपाचो यत्न
जे हल्लो करपी आसात तांकां कलम 307 लावपाचो, एनएसए कायदो लावपाचो आनी तडीपार करपाच्या शिश्टमंडळाचे मागणेचेर विचार करतले. तशेच गँगवॉर 100 टक्के गोंयातल्यान काबार करपा खातीर आमी पुलिसांक मेकळीक दिल्या. पुलीस फोन ट्रॅक करपाचे प्रक्रियेत आसात आनी मास्टर मायंड कोण आसा तो मेळटलो अशें डॉ. सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
