भांगरभूंय | प्रतिनिधी
पणजीः राज्यांत भूंयगत उदकाची पातळी उणी जायत आसा. भूंयगत उदकूय दूशीत जावपाक लागलां. उदका प्रदुशण आडावपा खातीर राज्य सरकारान केल्ल्या यत्नांत सगळ्यांचे सहकार्य गरजेचें आसा अशें मुख्यमंत्री डॉ. प्रमोद सावंत हांणी सांगलें. शुक्रारा पणजेंत वेगवेगळ्या खात्यां वतीनी आयोजीत केल्ल्या सरोवर पुनः निर्माण कार्यावळींत ते उलयताले. ह्या वेळार डॉ. शरद काळे, पर्यावरण संचालक सचिन देसाय, प्रदुशण नियंत्रण मंडळाचे अध्यक्ष लेव्हीसन मार्टिन, डॉ. गीता नागवेकार आनी उदका स्त्रोत खात्याचे मुखेल अभियंते ज्ञानेश्वर सालेलकार हाजीर आशिल्ले.
गोंयची सोबीतकाय फकत दर्यादेगांनीच ना. ते रानां, झरे, तळीं आनी पर्यावरणांतूय आसा. उदकाचें प्रदुशण जावचें न्हय हे खातीर आतां सावन ल्हान भुरग्यां मदीं जागृताय निर्माण करपाक जाय. कोयर पोतयेंत बांदून तो न्हंयेंत उडोवपाचीय संवय बंद करपाक जाय. उदकांतलें प्लास्टीक आतां नुस्त्यांच्या पोटांत मेळटा. पर्यायान ते आमच्या कुडींतय भितर सरता. प्लास्टीक विरगळपा खातीर एक हजार वर्सां परस चड काळ लागता. ताचे परिणाम आमकां तशेंच फुडले पिळगेक सोंसचे पडटले अशें मुख्यमंत्र्यान सांगलें.
पीएम अमृत सरोवर येवजणे खाला गोंयांतल्या 150 तळींचें संवर्धन करतात. सरोवर पुनः निर्माण खाला आनीक 39 तळींचें संवर्धन करतले. हें काम फकत सरकाराचेच न्हय तर लोकांनीय हातूंत मजत करपाची गरज आसा अशें मुख्यमंत्र्यान सांगलें.
सरकारी पांवड्यार दुर्लक्ष जाल्यार उदका स्त्रोतखात्या कडेन कागाळ करची. राज्यांतलीं तळीं खाजगी मालकीचीं न्हय तर सरकाराचीं आसा. पूण कांय जाणांक हें कळना. दर वर्सा मेरशींत मुद्दाम तळीं भरतात. सैमाचो नाश करपाची ही मानसिकताय बदलपाक जाय.
देशांत पयलेच खेपे पाणथळ वाठारांचो अॅटलास
उदका स्त्रोतखात्यान राज्यांतल्या सगल्या तालुक्यांतल्या पाणथळ वाठारांचो अॅटलास तयार केला. अशें करपी गोंय हें देशांतलें पयलें राज्य. सगळ्या तळ्यां विशीं म्हायती ह्या अॅटलासांतल्यान मेळटा. फुडाराक कोणेंय तळीं पुरपाचो यत्न केल्यार ह्या अॅटलासाच्या आदारान थंय पयलीं तळीं आशिल्ली कांय ना हें सिध्द करूं येता अशें मुख्यमंत्री डॉ. सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
