भांगरभूंय | प्रतिनिधी
गदग, खबरां संस्थाः गदग तालुक्यांतल्या हर्लापूर वाठारांत बिरेस्तार, 18 तारखेर जाल्ल्या भिरांकूळ अपघातांत तीग जाणांक मरण आयलें. मरण आयिल्ल्यां मदीं दोन पुलीस हवालदारांचो आस्पाव आसा.
कोप्पाळ सावन व्हड वेगान येवपी मोटारीच्या ड्रायव्हराचे अचकीत नियंत्रण सुटले आनी मोटार रस्त्याच्या डिव्हायडरा वय्लान दुसरे लेनांत गेली आनी उरफाटे दिकेन येवपी गोंय कदंब महामंडळाचे पणजी-हॉस्पेट बशीक नेटान धपको दिलो. ह्या अपघातांत मोटारीचें व्हड लुकसाण जाले. आनी मोटारीतल्या तिगांक जाग्यारुच मरण आयलें. बस ड्रायव्हर गंभीर जखमी जालो. ताका रोखडोच उपचारा खातीर हॉस्पिटलांत व्हेलो.
अर्जुन नेल्लूर (32), रवी नेल्लूर (35) आनी इरण्णा उप्पर (36) अशीं मरण आयिल्ल्यांचीं नांवां आसात. अर्जुन नेल्लूर हो हावेरी जिल्लो पुलीस नियंत्रण कक्षाचो हवालदार जाल्यार इरण्णा उप्पर कोप्पाळ जिल्लो पुलीस नियंत्रण कक्षाचो हवालदार आशिल्ले. रवी नेल्लूर हो अर्जुनाचो सोयरो आशिल्लो. तिगूय हावेरी जिल्ह्यांतल्या बंकापूर तालुक्यांतल्या हुनागुंड गांवांतले रहिवासी आशिल्ले. ह्या अपघातांत एकाच गांवांतल्या तिगांक मरण आयिल्ल्यान हावेरी जिल्ह्यांतल्या गांवांत आनी पुलीस कर्मचाऱ्यां मदीं दुख्ख पातळ्ळां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
