भांगरभूंय | प्रतिनिधी
नवी दिल्ली, खबरां संस्था ः मरण केन्ना आनी खंयच्या रुपान येतलें हें सांगप कठीण आसा. हाचेच एक उदाहरण दिवपी धक्को दिवपी गजाल मुखार आयल्या. 40 वर्सां पिरायेच्या एका कर्मचाऱ्यान फाटींत दुखता अशें सांगून सिक लिव घेता म्हूण सुटये खातीर बॉसाक मेसेज धाडली. बॉसानय “ओके, विसव घे” अशी जाप दिली. पूण हाचे उपरांत त्या कर्मचाऱ्याक काळजाचो आताक आयलो आनी ताका मरण आयलें. ह्या 40 वर्सां पिरायेच्या कर्मचाऱ्याच्या अशा मरणाक लागून कुटुंबासयत ताच्या वांगडी कर्मचाऱ्यांकय धक्को बसला.
ही घडणूक 13 सप्टेंबराक घडली. 40 वर्सां पिरायेच्या शंकराक सकाळीं फाटीत दुखपाचो त्रास जावपाक लागलो. देखून तांणे सकाळीं 8.37 वरांचेर आपल्या बॉसाक सुटये खातीर मेसेज केली. तशेंच बॉसान “ओके, विसव घे” असो रिप्लाय केलो. पूण फकत 10 मिनटांनी शंकराक कार्डिॲक अरेस्ट येवन मरण आयलें. सकाळीं 11 वरांचेर बॉस अय्यराक फोनाचेर ही म्हायती मेळ्ळी. सुरवेक बॉसाक हें खरें दिसूंक ना. मागीर ताणें शंकराचो पत्तो मेळोवपा खातीर दुसऱ्या सहकाऱ्या कडेन संपर्क सादलो आनी रोखडोच शंकराच्या घरां गेलो. तेन्ना ताका खरी घडिल्ली गजाल कळ्ळी. अय्यरान ह्या दुर्दैवी घडणुके विशीं एक्साचेर पोस्ट केलां.
हे घडणुकेक लागून सोशल मिडियाचेर काळजाच्या दुयेंसाच्या लक्षणां विशीं बरीच चर्चा सुरू जाल्या. फाटीत दुखप, थकवा येवप, घाम येवप, ओंकारी जावप अशा सौम्य लक्षणां कडेन दुर्लक्ष केल्यार भलायकेच्यो गंभीर समस्या निर्माण जावंक शकतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
