भांगरभूंय | प्रतिनिधी
नवी दिल्ली, खबरां संस्था ः आयटी मंत्री अश्विनी वैष्णव हांणी बिरेस्तारा सांगलें, 1 ऑक्टोबर सावन ऑनलायन गेमींग कायदो 2025 लागू जातलो. कायदो चालीक लावचे पयलीं सरकारान गेमींग कंपनीं, बँको आनी हेर भागधारकां कडेन जायत्यो चर्चा केल्यो. संवाद आनी सल्लामसलती खातीर सरकार पुरायपणान तयार आसा. नेम चालीक लावचे पयलीं गेमींग उद्देगा वांगडा आनीक एक बसका जातली अशें अशें केंद्रीय मंत्र्यान सांगलें.
ऑनलायन गेमींग प्रचार आनी नियमन विधेयक, 2025 देशांत रियल-मनी गेमींगाचेर पुरायपणान बंदी घालतले. ताका 22 ऑगस्टाक राष्ट्रपतींची मान्यताय मेळ्ळी. आतां ताचें कायद्यांत रुपांतर केलां. हाचे आदीं 21 ऑगस्टाक राज्यसभेंत आनी 20 ऑगस्टाक लोकसभेंत हें विधेयक मंजूर जाल्लें.
ऑनलायन गेमींग कायद्यांतले 4 खर नेम
ह्या कायद्या प्रमाण खेळ कुशळटायेचेर आदारीत आसूं वा संदीचेर आसूं ह्या दोनूय खेळांक बंदी आसा.
रियल-मनी गेमींचेर बंदी: खंयच्याय पयशांचेर आदारीत गेमीची ऑफर दिवप, चलोवप वा प्रचार करप बेकायदेशीर आसा.
ख्यास्त आनी दंड: रियल-मनी गेम ऑफर करप्याक वा प्रचार करपी कोणाकूय तीन वर्सां मेरेन बंदखण आनी 1 कोटी मेरेन दंड भरचो पडटलो. जायराती चलोवप्यांक दोन वर्सां मेरेन बंदखण आनी 50 लाख मेरेन दंड आसतलो.
नियामक प्राधिकरण: गेमींग उद्देगाचें नियमन करपाक, गेमीची नोंदणी करपाक आनी खंयच्यो गेमी रियल-मनी गेम आसात तें थारावपाक एक खाशेलो प्राधिकरण तयार करतले.
ई-स्पोर्ट्स प्रमोशन: PUBG आनी फ्री फायर सारकिल्या ई-स्पोर्ट्स आनी समाजीक गेमींक तेंको दितले. ह्यो गेमी खेळपाक फुकट आसात, देखून तांचो प्रचार जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
