भांगरभूंय | प्रतिनिधी
बायले आड पुलिशेंत गुन्यांव नोंद
म्हापशें: लोपेजवाडा, काणका- पर्रा हांगा वीज खात्याच्या मिटर रिडराक गाळी संवून ताका हॅल्मॅटान मारपेट करपाचो प्रकार घडलो. ह्या प्रकरणांत म्हापशें पुलिसांनी 60 वर्सां पिरायेचे बायले आड गुन्यांव नोंद केला.
ही घडणूक काल (बिरेस्तारा) सकाळीं 10 वरांच्या सुमाराक घडली. ह्या प्रकरणांत साई अर्जून नायक (मयें) हो म्हापशें वीज कचेरेचो मिटर रिडर वीज कर्मचाऱ्यान पुलिशेंत कागाळ नोंद केल्या.
कागाळदार हो काणका आनी पर्रा वाठारांत मिटर रिडींग घेवपा सयत गिरायकांक वीज बिलां वेळार दितालो. दुबावीत बायलेच्या घरा तो बील दिवपा खातीर गेलो तेन्ना तिणें ताका गाळी संवल्यो. तूं आमकां वीज बील सारकें दिना असो आरोप करून तिणें ह्या मिटर रिडराच्या कानसुलार फुलयलें आनी ताच्या हातार हॅल्मॅट मारलें.
कागाळदाराच्या आदारान म्हापशें पुलिसांनी बायले आड सरकारी कर्मचाऱ्याक गाळी संवप, धमकी दिवप आनी मारपेट करपाच्या आरोपा खाला भा. न्या. सं. च्या 352, 352(3) आनी 121(1) कलमा खाला गुन्यांव दाखल केला.
फुडलो तपास पुलीस उपनिरिक्षक विराज कोरगांवकार आनी हवलालदार सुशांत चोपडेंकार करतात.
मजगतीं, कागाळदार मिटर रिडर हो बुधवारा 17 वेर दुबावीत बायलेच्या घरा वीज बील दिवपा खातीर गेल्लो. पूण घराच्या प्राकारांत सुणीं आशिल्लीं आनी घर बंद आशिल्लें. ताका लागून तो परतून आयलो. बिरेस्तारा आपल्या सहकारी मिटर रिडर कर्मचाऱ्या सयत तो परतून घडणूक थळार गेलो तेन्ना दुबावीत बायले कडल्यान हो मारपेटीचो प्रकार घडलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
