साळगांवचो कोयर प्रक्रिया प्रकल्प अचडणींत

भांगरभूंय | प्रतिनिधी

सरभोंवतणचे उदका स्त्रोत प्रदुशीत, प्रदुशण नियंत्रण मंडळाची नोटीस

पणजीः साळगांव सड्या वेलो कोयर प्रक्रिया प्रकल्प अडचणींत सांपडला. सड्या सकयल आशिल्ले उदकाचे स्त्रोत जशें की सैमीक झरे आनी बांयांतल्या उदकाचे सॅम्पल दुशीत सांपडल्यात. देखून हो प्लांट बंद कित्याक करचो न्हय अशी कारणां दाखया नोटीस गोंय प्रदुशण नियंत्रण मंडळान काडल्या. पूण सद्या तरी कोयराची प्रक्रिया चालू आसा अशी म्हायती गोंय कोयर वेवस्थापन म्हामंडळाच्या अधिकाऱ्यान दिली.

साळगांव सड्या सकयल गांवारावाडो कळंगूट वाठारातल्यो सैमीक झरी आनी बांयांचे उदक साळगांव कोयर प्रकल्पांतल्यान येवपी म्हेळ्या उदकाक लागून दुशीत जालां अशी कागाळ थळाव्यांनी गोंय प्रदुशण नियंत्रण मंडळा कडेन केल्ली.

हे कागाळीची दखल घेवन प्रदुशण नियंत्रण मंडळान उदकाचे सॅम्पल घेवन ते चांचणे खातीर प्रयोगशाळेंत धाडले. थंय हे सॅम्पल दुशीत आशिल्ल्याचें निश्चीत जालें. उपरांत प्रदुशण नियंत्रण मंडळान साळगांव कोयर प्रक्रिया प्रकल्प चलोवपी हिंदुस्तान वॅस्ट ट्रीटमेंट प्रा. लि. हांकां नोटीस काडली.

मुळावे चवकशेंत दिसून आयलें की प्रक्रिया करूंक नाशिल्लें म्हेळें उदक प्लांटातल्यान थेट पावसाचे उदक व्हांवून वचपी गटारांनी सोडटाले, आनी हें उदक वचून सड्या सकयल आशिल्ल्या राबितो वाठारांतले सैमीक झरे आनी बांयांनी वचून उदक दुशीत करतालें.

प्रयोग शाळेंतल्या अहवालांत उदकाच्या सॅम्पलांत गंभीर त्रुटी दाखोवन दिल्यात. उदकाचें प्रदुशण नियंत्रण आनी प्रतिबंध कायद्या खाला उदक खदूळ जावप, क्लोरायड, एमोनीएकल नायट्रोजन, बोरोन, लोह आनी विखारी क्रोमियम हे मापदंड मर्यादे परस चड आसा, हें सिध्द जालें.

उपरांत गोंय प्रदुशण नियंत्रण मंडळान प्रकल्पांक कारणां दाखया नोटीस धाडून ह्या घाळपणां खातीर हो प्रकल्प बंद कित्याक करचो न्हय अशी जाप सात दिसां भितर दिवपाक सांगल्या. नाजाल्यार मंडळा कडल्यान फुडली कारवाय जातली अशी शिटकावणी दिल्या.

साळगांव कोयर प्रक्रिया प्रकल्पांक कारणां दाखय नोटीस काडले उपरांत हो प्लांट बंद जाला असो गैरसमज कांय पालिकां मदीं जालो. जर हो प्लांट बंद जायत जाल्यार कोयर खंय व्हरप ह्या हुस्क्यांत पालिका आसात.

हे विशीं स्पश्टीकरण दितना गोंय कोयर वेवस्थापन म्हामंडळाच्या अधिकाऱ्यान सांगलें, कोयर प्रकल्प बंद उडोवंक ना. फक्त प्रदुशण नियंत्रण मंडळान कारणां दाखया नोटीस काडल्या.

प्रकल्पांत कोयराची प्रक्रिया दीसपट्टी चालू आसा आनी दीसपट्टें आमी कोयर घेत आसात. प्लांट बंद उडोवप हें शक्यूच ना. प्रदुशण नियंत्रण मंडळान सात दिसां भितर जाप दिवपाक सांगल्या. प्लांट चलोवपी जी कंपनी आसा तांणी जाप दिले उपरांतच प्रदुशण नियंत्रण मंडळ फुडली कारवाय थारयतलें अशी अधिकाऱ्यान म्हायती दिली.

साळगांव कोयर प्रक्रिया

प्रकल्प घाताची घांट: मायकल

साळगांवचो कोयर प्रक्रिया प्रकल्प ही घाताची घांट जावन आसा. हो प्लांट भिरांकूळ स्थितींत ओव्हरलोड जाला आनी कोसळपाच्या मार्गार आसा अशी भिरांत कळंगूटचे आमदार मायकल लोबो हांणी उक्तायली.

हांवें स्वता वचून तीन वरां प्लांटाची स्थिती पळयल्या आनी हो प्लांट इतल्या व्हड प्रमाणांत कोयर हाताळपाक तयार करूंक ना. हो प्लांट फक्त उत्तर गोंयच्या दर्यादेग वाठारांतल्या कोयराचेर प्रक्रिया करपा खातीर बांदिल्लो. पूण आतां ह्या प्लांटात दक्षीण गोंयच्याे 10-12 पंचायती आनी पालिका तशेंच तिसवाडीच्या 10-12 पंचायतींचो कोयर येता. हे बरोबर न्हय अशें मायकल हांणी म्हणलें.

प्लांट ओव्हरलोड जाल्ल्यान जो ओलो कोयर आसा तो माक्नां भितर वचना आनी ताचे दोंगर जावन ताची रास वयल्यान पडपाक लागल्या. जर अशेंच चलत उरलें जाल्यार हो प्लांट केन्ना तरी कोसळटलोच अशें मायकल लोबो हांणी सांगलें.