भांगरभूंय | प्रतिनिधी
मुख्यमंत्र्यांची हल्लेखोरांक शिटकावणी
सुरेश नायक सयत पांच दुबावितांक अटक
हल्ल्याचो विरोधी पक्षांनी केलो निशेध
भांगरभूंय । प्रतिनिधी
पणजी : करंजाळे जाल्ल्या हल्ल्या सारके हल्ले सरकार सोंसचें ना. रामा काणकोणकार हाचेर जाल्ल्या हल्ल्याचो निशेध करतना हल्लेखोरांक अटक करून कारवाय करपाचे आदेश यंत्रणेक दिल्यात, अशें मुख्यमंत्री डॉ. प्रमोद सावंत हांणी सांगलें. मजगतीं, रातीं उसरां ह्या हल्ल्या प्रकरणांत अँथनी नदार, फ्रान्सीस नदार, मिंगेल आरावजो, मनीष हडफडकार हांचे सयत खापो गुन्यांवकार सुरेश नायक हाका रातीं उसरां अटक केली.
रामा काणकोणकार ह्या सामाजीक वावुरप्याचेर करंजाळे वाठारांत दनपारां हल्लो जालो. ह्या हल्ल्याचो सगळ्या राजकी पक्षांनी निशेध करतना कारवायेची मागणी केल्ली.
काँग्रेसीचे आमदार कार्लोस फेरेरा, भाजपाचे आमदार रूडॉल्फ फर्नांडीस, उत्पल पर्रीकार, उटा तशेंच सामाजीक कार्यकर्त्यांनी ह्या हल्ल्याचो निशेध करतना कारवायेची मागणी केल्ली.
गोंय सुरक्षीत ना : काँग्रेस
गोंयांत आतां दिसाच्या वेळार हल्ले जावपाक लागल्यात. गोंय आतां पयली सारकें सुरक्षीत उरूंक ना. कायदो आनी सुवेवस्था सामकी इबाडल्या. हल्लेखोरांक बेगोबेग अटक करून पुलिसांनी कायदो सुवेवस्था राखपाक जाय, अशी मागणी काँग्रेस विधीमंडळ फुडारी युरी आलेमांव हांणी केल्या. रामा काणकोणकार हांचेर जाल्या हल्ल्याचो तांणी निशेध केलो. उपचार चालू आसतना गोंय वैजकी म्हाविद्यालय हॉस्पिटलाक भेट दिवन तांणी रामा काणकोणकार हांचे भलायकेची वासपूस केली.
गोंयांत कांय गुन्यांव पुलिसांचे मजतीन जातात. हाचे खातीर लोकांचो आतां पुलिसांचेर विस्वास उरूंक ना. हाचे पयलीं रामा काणकोणकार हांचेर न्यायालया भायर हल्लो जाल्लो. पुलिसांचो आतां धाक उरूंक ना, अशें युरी आलेमाव हांणी सांजे वेळार म्हणिल्लें.
प्रदेश काँग्रेस अध्यक्ष अमीत पाटकार हांणी लेगीत हल्ल्याचो निशेध केला.
‘आप’ची आंदोलनाची शिटकावणी
रामा काणकोणकार हांचेर जाल्लो हल्लो हो पुलीस आनी सरकाराचें अपेस आसा. हल्लेखोरांक 24 वरां भितर अटक केली ना, जाल्यार आम आदमी पक्ष आंदोलन करतलो, अशी शिटकावणी आमदार वेंझी व्हिएगस हांणी दिल्ली. रामा काणकोणकार हांचेर जाल्ले हल्ल्याचो तांणी निशेध केला.
हो हल्लो रामा काणकोणकार हांचेर जावंक ना, जाल्यार एसटी समाज आनी सेगीत आवाज काडपी कार्यकर्त्याचेर जाला, अशें आपचे अध्यक्ष अॅड. अमीत पालेकार हांणी म्हणलां.
हो गोंयकाराचेर जाल्लो हल्लो : गोवा फॉरवर्ड
रामा काणकोणकार हांचेर जाल्लो हल्लो हो ताचेर जावंक ना जाल्यार दरेका गोंयकाराचेर जाला. हांव ह्या हल्ल्याचो निशेध करता. हो हल्लो गोवा फॉरवर्ड सोंसचो ना. न्याया खातीर आमी झगडटले, अशें गोवा फॉरवर्डाचे अध्यक्ष आनी आमदार विजय सरदेसाय हांणी म्हणलां.
खोलायेन चवकशी जावची : आरजी
गोंयांतली कायदो आनी सुवेवस्था इबाडत आसा. गोंयांत हिंसाचारक थारो आसपाक जाय ना. ह्या हल्ल्याचो पुलिसांनी खोलायने तपास करचो, अशी मागणी आरजीचे मुखेली मनोज परब हांणी सांजे वेळार केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
