भांगरभूंय | प्रतिनिधी
रस्त्या वयल्या चिखलाचेर दुचाकी निसरली, सनी अवजड गाडये पोंदां चिड्डलो
भांगरभूंय । प्रतिनिधी
म्हापशें : सुकूर, पर्वरे चिखल जाल्ल्या रस्त्यार दुचाकी पडले उपरांत गाडी आंगा वयल्यान गेल्ल्यान सनी नार्वेंकार (28, नानोडें- दिवचल) हाका मरण आयलें. जाल्यार शुभम मावळींगकार जखमी जालो.
बिरेस्तारा, 18 तारखेर सकाळीं सुमार 10 वरांचेर हो अपघात जालो. सनी आनी जखमी जाल्लो शुभम पर्वरी सावन म्हापशें वटेन वताले. सुकूरच्या पर्वरी पोरणें बाजार जंक्शना पसून कांय अंतराचेर हो अपघात जालो.
म्हामार्गा वयलें डांबर आनी काँक्रीट गेल्ल्यान ह्या रस्त्यार चिखल जाला. ह्या रस्त्या वयल्यान वतना दुचाकी निसरली आनी फाटल्या बशिल्लो सनी नार्वेकार सकयल रस्त्यार पडलो आनी आंगा वयल्यान गाडी गेल्ल्यान ताका सुवातेरुच मरण आयलें. जाल्यार शुभम मावळींगकार दुचाकी सयत रस्त्या कुशीक पडलो. आनी तो जखमी जालो.
अपघाताची म्हायती मेळटकच पर्वरी पुलीस निरिक्षक राहुल परब, उपनिरिक्षक मंदार परब, प्रतीक तुळसकार आनी हवालदार श्रीपाद तारी आनी पर्वरी येरादारी पुलीस घडणूक सुवातेर पावले. पर्वरी पुलिसांनी घडणुकेचो पंचनामो करून कूड पोस्टमॉर्टमा खातीर जीएमसींत धाडली. जखमी शुभम हाचेर पर्वरी भलायकी केंद्रांत मुळावे उपचार केलें. अपघाता उपरांत पळून गेल्ल्या अनवळखी ट्रकाचो सोद पुलीस घेतात.
इश्ट शुभम हाचे वांगडा सनी जीएमसींत आपले आवयच्या मुताची चांचणी अहवाल घेवपाक गेल्लो. अहवाल घेवन ते म्हापशें वटेन परत येतना ही घडणूक घडली. सनी हो खाजगी कंपनींत काम करतालो. पर्वरी फ्लायओव्हराच्या (एलिवेटर कॉरिडोर) बांदपाक लागून गिरी ते पर्वरी हांचे मदल्या राष्ट्रीय म्हामार्गाचेर सकाळीं 6 ते रातीं 10 मेरेन अवजड गाडयांचे येरादारीचेर बंदी घाल्या. हे संबंदांत आदेश उत्तर गोंय जिल्होधिकाऱ्यान जारी केला. पूण ह्या बंदी काळांत हायवेचेर व्हड वाहनांची येरादारी चालूच आसा अशें ह्या अपघाता उपरांत उक्तें जालां. वयल्या आदेशाचें व्हड प्रमाणांत उल्लंघन जाल्ल्यान निरपराधी मोटारी चालकांक मरण येवपाक लागलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
