भांगरभूंय | प्रतिनिधी
मडगांवः दक्षीण गोंय जिल्लो सत्र न्यायालयान ट्रॅव्हल एजंट कृष्णा नायक (कुळें) हाका सशर्त अटकपूर्व जामीन मंजूर केलो. ताणें दुधसागर घसघशाक भेट दिवपाक आयिल्ल्या पर्यटकांक परत येतना म्हालरेल्वेंतल्यान वचपाचो सल्लो दिल्लो. हे संबंदी दक्षीण अस्तंत रेल्वे पुलिसांनी ताचे आड गुन्यांव नोंद केल्लो.
ह्या प्रकरणांतले पर्यटक कुणाल कपूर आनी शेखर तिवारी 16 जुलय 2025 दिसा गोंयांत पर्यटना खातीर आयिल्ले. तांणी स्वताच्या गाडयेतल्यान कुळें वचून दुधसागर घसघशाक भेट दिवपाचे थारायले. थंय तांची वळख ट्रॅव्हल एजंट कृष्णा नायक हांचे कडेन जाली. नायक हांणी तांची हेर पर्यटकां सयत रेल्वेंतल्यान दूधसागराक वचपाची वेवस्था केली. पूण परत येतना नायक हाणें तांकां अधिकृतपणान दूधसागराक पाविल्ले म्हालगाडींत चडपाचो सल्लो दिलो. हाचे उपरांत तांणी नायक हांचे आड दक्षीण पश्चिम रेल्वे पुलिशेंत गुन्यांव नोंद केलो.
हाचे उपरांत कृष्णा नायक हांणी दक्षीण गोंय जिल्लो सत्र न्यायालयांत अटकपूर्व जामीनाचो अर्ज दाखल केल्लो. सरकारी वकिलांनी जामीनाक विरोध करतना अर्जदार राजकी नदरेन प्रभावी मनीस आनी साक्षीदारांचेर चेंपण हाडूंक शकता असो युक्तिवाद केलो. दुसरे वटेन दुबाविताच्या वकिलांनी ज्या गुन्यांवाची चवकशी सुरू आसा ताका अटक करपाची गरज ना असो मुद्दो मांडलो.
दोनूय वटांचो युक्तिवाद आयकून न्यायाधीश शेरीन पॉल हांणी दुबाविताक सशर्त अटकपूर्व जामीन मंजूर केलो. 25 हजार रुपयांचो वैयक्तीक बाँड, तपास अधिकाऱ्यां प्रमाण हमीदार दिवप, न्यायालयाची परवानगी घेनासतना राज्य सोडप ना, साक्षीदारांचेर चेंपण हाडचे न्हय अशा अटींचेर अटकपूर्व जामीन मंजूर केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
