भांगरभूंय | प्रतिनिधी
भांगरभूंय । प्रतिनिधी
पणजीः साळगांव पठारा वयलो कोयर प्रक्रीया प्रकल्प हो सरकारान तयार केल्ली आपत्ती. ह्या प्रकल्पांक लागून उदका स्त्रोत दुशीत जावन लोकांक ल्हव ल्हव मारपाचो यत्न जाता. नोटीसी न काडटा जे लोक जापसालदार आसा तांकां बंदखणींत उडोवन लोकांचो जीव वाटोवचो, अशी मागणी तृणमूल काँग्रेस पक्षाचे (टीएमसी) राष्ट्रीय म्हणयारे ट्रोजन डिमेलो हांणी केली.
पणजे टीएमसीच्या कचेरेंत आपयल्लें पत्रकार परिशदेत ट्रोजन डिमेलो उलयताले. ह्या वेळार टीएमसी गोंयचे निमंत्रक मारीयान रोड्रीग्स हजर आशिल्लें. साळगांव कोयर प्रकल्पांक लागून गावरावाडो कळंगुटेची झर, साळगांवची फामाद सालमोना झर आनी सांगोल्ड्यांची झर सयत बायो दुशीत जाल्या, अशें ट्रोजन हांणी सांगलें.
गोंय प्रदुषण नियंत्रण महामंडळान प्रकल्पांक कारणा दाखया नोटीस काडून प्लॉट कित्याक बंद उडोवचो न्हय हाची जाप सात दिसा भितर दिवपाक सागलां. जर प्लॉट बंद उडयलो जाल्यार विशय सुटावो जातलो. तो मेरेन कोयर मायकल लोबो वा केदार नायक हांचे घरा व्हरतले काय? असो प्रश्न डिमेलो हांणी केलो.
साळगांव कोयर प्रकल्पांची परिस्थिती हाता भायर गेली म्हणपी मायकल काँग्रेसीतल्यान भाजपात उदरगती खातीर कांय पाड घालपाक गेल्लो हे तांणी सांगचें. हो प्रकल्प भाजपाचीच निर्मिती आसा आनी हो प्रकल्प हाडपा फाटल्यान मायकल हो बुदवंत आसा. ह्या वाठारांतल्यो सगळ्यो बायो दुशित जाल्यात. हो प्रकल्प सरकार निर्मित आपत्ती आसा जी ल्हव ल्हव विख घालून लोकांक मारून उडयता, असो आरोप डिमेलो हांणी केलो.
पावसाचे उदक मुरोवन दोंगर हो एक जलाशयाचे काम करता आनी हो कोयर प्रकल्प हे दोंगरावयरच बांदला. ह्या कारणांक लागून साळगांवच्यो सगळ्यो बायो दुशित जाल्यात. कांदोळे आनी निर्ला ह्या पयसुल्ल्या वाठारांत कोयराच्यो घाणी पातळ्ळ्यात. सैमिक न्यायाच्या नांवान नोटीस काडून वेळ दिवन जावचे ना. ह्या वाठारांत विख पातळपाचे काम चल्ला देखून जे लोक जापसालदार आसात तांकां बंदखणींत घालपाक जाय, अशी मागणी डिमेलो हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
