भांगरभूंय | प्रतिनिधी
पणजी ः मोपाच्या मनोहर आंतरराष्ट्रीय विमानतळा विशीं ‘गोवा का हॉन्टेड एअरपोर्ट’ असो चुकीचो व्हिडियो प्रसारीत केल्ल्या प्रकरणांत दिल्लीचो युट्युबर अक्षय वशिष्ट हाका अटक केल्ली. बुधवारा रातीं पयलो वर्ग न्यायालयान ताका जामीन मंजूर केलो. ताका अटक करपा खातीर योग्य प्रक्रिया पाळूंक नाशिल्ल्यान न्यायालयान पुलिसांचेर खर टिका केली.
पुलिसांनी दिल्ले म्हायती प्रमाण, हो व्हिडियो ‘रिअल टॉक क्लिप्स’ नांवाच्या फेसबूक पेजीचेर अपलोड केल्लो. तातूंत चुकीचे आनी अंधश्रद्धेचे दावे करून लोकां मदीं भंय निर्माण करपाचो यत्न केल्लो. गोंय पुलीस मुख्यालयाच्या सोशल मिडिया मॉनिटरिंग सेलांत काम करपी कॉन्स्टेबल सूरज शिरोडकार हाणें हे विशीं कागाळ दाखल केल्ली. हाचे उपरांत पुलिसांनी दिल्लीच्या द्वारका वाठारांत अक्षय वशिष्टाचो सोद घेतलो. मोपा विमानतळ पुलीस स्टेशनाच्या पंगडान ताका दिल्ली धरलो आनी चवकशी खातीर गोंयांत हाडलो.
पूण रातच्या सुमार 11.11 वरांचेर पेडणें पयलो वर्ग न्यायालयाचे न्यायाधीश शबनम नागवेंकार हाणें वशिष्टाक जामीन मंजूर केलो. ताका अटक करचे पयलीं कसलीच सुचोवणी दिवंक नाशिल्ल्यान ताच्या कायदेशीर हक्कांचे उल्लंघन जाल्ल्याचें न्यायालयान निरिक्षण नोंद केलें. ह्या प्रकरणाची चवकशी अजून चालू आसा. गोंयांतल्या म्हत्वाच्या मुळाव्या साधन सुविधां विशीं चुकीची म्हायती आनी भंय पातळावपी लोकांचेर पुलीस बारीक नदर दवरतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
