भांगरभूंय | प्रतिनिधी
स्मृती मंधानाचो (117) शेंकडो आनी दिप्ती शर्माची (40) चिवट बॅटिंगे उपरांत बॉलरांनी केल्ल्या उत्कृश्ट प्रदर्शनाच्या नेटार भारतीय बायलांच्या क्रिकेट पंगडान दुसरे वन डे मॅचींत ऑस्ट्रेलियेच्या बायलांच्या पंगडाक 102 अशा व्हडा फरकान हारायलो. ह्या जैतान भारतान माळ 1-1 अशी बरोबरींत सोडयली.
293 धांवड्यांचो फाटलाव करपाक मैदानांत देंवपी ऑस्ट्रेलियेची सुरवात बाबत जाली. 12 धांवड्यांचेर ताणें 2 विकेटी व्हगडायल्यो. जॉर्जिया वॉल (0) हिका रेणुका सिंह हिणें बोल्ड केली. पांचवे ओव्हरींत क्रांती गौडान मुखेली एलिसा हिली (6) हिका बाद केली. एलिस पेरी आनी बेथ मुनी हांणी डाव सांबाळपाचो यत्न केलो. 17वे ओव्हरींत स्नेह राणान बेथ मुनीक (18) बाद केली.
ते उपरांत बॅटिंगेक आयिल्ले एनाबेल सदरलॅण्ड हिणें एलिस पेरी वांगडा मेळून चवथे विकेटी खातीर 46 धांवड्यांची भागिदारी केली. 25वे ओव्हरींत राधा यादव हिणें एलिस पेरी (44) स्वताचेच बॉलिंगेचेर कॅच बाद केली.
30वे ओव्हरीच्या तिसऱ्या बॉलाचेर अरुंधती रेड्डीन एनाबेल सदरलॅण्ड (45) हिका बाद केली. एश्ली गार्डनर (17), तालिया मॅक्ग्रा (16) हांकां दिप्ती शर्मान बाद केली. अलाना किंग (2) ही धांवबाद जाली. क्रांती गौड हिणें 41वे ओव्हरीचे पांचव्या बॉलाचेर जॉर्जिया वेयरहम (10) हिका बोल्ड करून ऑस्ट्रिलेयेचो डाव 190चेर सोंपयलो.
ते आदीं ओपनर स्मृती मंधानान 91 बॉलांनी 117 धांवड्यांची खेळी केली. तिणें 14 चवके आनी चार सके मारले. तिणें 77 बॉलांनी शेंकडो पूर्ण केलो. बायलांचे वन डे क्रिकेटींत ऑस्ट्रेलिये आड जलद शेंकडो मारपी ती पयली बॅटर थारली.
तशेंच भारता वतीन दुसरो जलद शेंकडो लेगीत नोंदयलो. भारता वतीन जलद शेंकडो पूर्ण करपाचो विक्रम तिच्याच नांवाचेर आसा. आयरर्लेण्डा आड तिणें फकत 70 बॉलांनी शेंकडो नोंदयिल्लो.
तिचो हो वट्ट 12वो वन डे शेंकडो आसा. बायलांचे वनडे क्रिकेटींत सगल्यांत चड शेंकडे मारपाचे वळेरेंत ती जोड रितीन तिसरे सुवातेर आसा. पयले सुवातेर ऑस्ट्रेलियेची आदली मुखेली मेग लॅनिंग हिच्या नांवाचेर आसा. तिणें वट्ट 15 शेंकडे मारल्यात. दुसरे सुवातेर न्युझिलॅण्डाची सुझी बेट्स आसा. तिणें 13 शेंकडे मारल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
