ओझोन थर : पृथ्वीचें कवच

भांगरभूंय | प्रतिनिधी

दर वर्सा 16 सप्टेंबर हो संवसारीक ओझोन डे म्हूण मनयतात. भारतांतूय तो मनयलो. ह्या थराक लागून पृथ्वी वयल्या सगल्या जीवजंतुंचे सुर्याच्या घातक किरणां पसून रक्षण जाता. ताका लागून आमी जगपाक शकतात.
दिसानदीस प्रदुशणांत वाड जायत आसा. वायू प्रदुशण, आवाजाचें प्रदुशण, पर्यावणाची हानी जाता, ते घटकांचो वापर वाडला. प्लास्टिक आतां दरेके गजाली खातीर लोक वापरूंक लागल्यात. झाडां कापून इमारती बांदप वाडलां. तीं कापिल्ल्यान ताचो परिणाम ओझोन थराचेर जाता. ओझोन थर हो आमचे पृथ्वीचें सुरक्षा कवच. गाडयांचो धुंवर, प्लास्टीकाच्यो पोतयो, कपां, कार्बन सारक्या साबार वायू, रसायना खातीर धोको निर्माण जाला. ताका लागून आमच्या घरा भोंवतणी झाडां लावप गरजेचें. भौशीक गाडयो वापरप, खाजगी गाडी गरज पडटा तेन्नाच भायर काडप, जेवतना केळीचीं पानां वापरप, पणसाच्या खोलयांच्यो पत्रावळी वापरप खरेंच हिताचें.
इको फ्रेंडली उत्पादनाचो वापर चडांत चड करप गरजेचें. बाजारांतली कसलीय वस्तू हाडटना ती कापडी पोतयेंत हाडप, भायर उडोवपाची प्रत्येक प्लास्टीक वस्तू पालिका वा पंचायती वतीन कोयर एकठांय करतात, तांकां दिवप ह्यो गजाली आमी पाळपाक जाय.
आमचे येवपी पिळगेक पर्यावरणाचें प्रदुशण, लुकसाण ही एक व्हडली समस्या आसतली. ताका लागून आमकां जबाबदारीची जाणीव आसपाक जाय. हांवें एकल्यान एक पोती भायर उडयल्यार कितें जाता, अशें म्हणप चुकीचें. एक लाख लोकांनी असोच विचार केल्यार एक लाख पोतयो रस्त्यार पडटल्यो. आमी दरेकल्यान पर्यावरणीय जिणेंशैली स्विकारपाक जाय. ही काळाची गरज.
शाळा, म्हाविद्यालयांनी जनजागृताय करप गरजेचें. जांकां खबर ना, तांकां आमी पर्यावरण राखणेची, प्रदुशणाची म्हायती दिवपाक जाय. आमी आमच्या घरा पसून ही सुरवात करपाक जाय. तरुच पृथ्वी सुरक्षीत उरतली. फुडले पिळगे खातीर सुंदर, सोबीत सैम दवरप ही प्रत्येक ल्हान, व्हड मनशाची जापसालदारकी.
ओझोन थर आमकां सुर्याच्या खर किरणां पसून वाटायता. आमी रसायनांचो वापर कमी केलो, नितळसाण राखली, प्रदुशणांत वाड केली ना, पेट्रोल उणें वापरलें, सौर उर्जेचो वापर केलो, चडांत चड झाडां लायलीं जाल्यार सैमातलो कार्बन डायोक्सायड उणो जातलो. मागीर ओझोन थराचें आपशीच संरक्षण जातलें. ओझोन थर हो पृथ्वीचो आदार.

सिद्धी तिळवे
9158200956