भांगरभूंय | प्रतिनिधी
3 लाख, 5 लाख, 10 लाख रुपयांचीं मेळटलीं इनामां
नितळसाण कामगारांचे भलायकेची फुकट तपासणी
भांगरभूंय । प्रतिनिधी
पणजी : गोंयच्या नगरपालिकांक नितळसाणी खातीर शार उदरगत खात्या वरवीं इनामां फावो जातलीं. 3 लाख, 5 लाख आनी 10 लाखांचीं हीं इनामां आसतलीं. तशेंच नितळसाण कामगारांची वर्सांतल्यान एकदां भलायकेची फुकट तपासणी जातली, अशें शार उदरगत खात्याचे मंत्री विश्वजीत राणे हांणी सांगलें.
शार उदरगत खात्या वतीन ‘स्वच्छता ही सेवा’ मोहिमेची सुरवात जाली. पणजे मिनेझीस ब्रागांझा सभाघरांत जाल्ले कार्यावळीक मंत्री विश्वजीत राणे हांणी ही घोशणा केली. हे कार्यावळीक खात्याचे सचीव यतींद्र मराळकार, संचालक ब्रिजेश मणेरकार आनी हेर मानेस्त हाजीर आशिल्ले.
प्रधानमंत्री नरेंद्र मोदी हांणी हातांत सान्न घेवन नितळसाण मोहिमेची सुरवात केल्ली, तेन्ना सगळे जाण फकाणां मारताले. हे मोहिमेक बरेच येस आयलां. नितळसाणीचें म्हत्व सगळ्यांक कळपाक मजत जाली. केंद्र सरकारा वतीन नितळसाणी खातीर बरीच इनामां आसात. आतां गोंय सरकारा वतीन लेगीत नितळसाणी खातीर पालिकांक इनामां दितले. नितळसाण करपी कामगारांक मान मेळपाक जाय. तांची भलायकी लेगीत म्हत्वाची आसा. सगळ्या पालिकांनी नातळसाण कामगारांची वळेरी खात्याक दिवची. गोंय वैजकी म्हाविद्यालया वतीन नितळसाण कामगारांची भलायकेची फुकट तपासणी जातली. नितळसाणी खातीर गोंय कोयर वेवस्थापन म्हामंडळ ही मुखेल एजन्सी आसा. नितळसाणीचो वावर हे एजन्सीच्या आदारान फुडें व्हरचो पडटलो. कोयर एकठांय करपा सयत तो वेगळो करपा खातीर तज्ञां वरवीं कामगारांक मार्गदर्शन दिवपाची गरज आसा. हाचे खातीर कार्यशाळा जातल्यो. पालिकांक म्हत्वाचो असो प्रकल्प चालीक लावपा खातीर 2 कोटी रुपया मेरेन तजवीज करपाचो प्रस्ताव आसा, अशें मंत्री विश्वजीत राणे हांणी सांगलें.
घरांत सुण्याची घाण हांवें काडल्या : विश्वजीत राणे
18 वर्सां पयली आमच्या घरांत सुणो हाडिल्लो. ताची घाण हांवें काडल्या. आपूण जेन्ना नितळसाणीचें काम करता तेन्नाच हेर कामगारांक तें कर म्हणून सांगप शक्य जाता, अशें मंत्री विश्वजीत राणे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
