भांगरभूंय | प्रतिनिधी
दिगंबर कामत : अभियंता दीस कार्यावळींत अभियंत्यांचो सत्कार
भांगरभूंय । प्रतिनिधी
फोंडें : ज्या लोकांनी शुन्यांतल्यान विश्व निर्माण केलां, त्या लोकांचें अनुकरण केन्नाय बरें. गोंयच्या दरेका मळा वयल्या लोकांनी आयज डॉ. रघुनाथ माशेलकार हांचेर आदर्श दोळ्यां मुखार दवरून वाटचाल करची. अशें केल्ल्यान एक नवो संवसार घडोवपाची आस्त निश्चीत निर्माण जातली, अशें भौशीक बांदकाम मंत्री दिगंबर कामत हांणी सांगलें.
सरकारी अभियंता संघटणे वतीन आयोजीत केल्ले अभियंता दीस कार्यावळींत मंत्री कामत उलयताले. ह्या वेळार माचयेर उद्दोजक संदीप निगळे, खास निमंत्रीत डॉ. पूर्णानंद सावयकार, संघटनेचे अध्यक्ष आनंद वाघुर्मेकार, सचीव काशिनाथ सराफ हाजीर आशिल्ले.
मंत्री कामत हांणी सांगलें, प्रधानमंत्री नरेंद्र मोदी हांणी विकसीत भारताचें सपन पळयलां. दरेका गांवाची जेन्ना उदरगत जातली त्या वेळार हें सपन प्रत्यक्षांत येतलें. ते खातीर अभियंत्यांचें योगदान म्हत्वाचें आसतलें. दरेका उदरगतीच्या प्रकल्पाक विरोध जाता आसतना अभियंत्यांनी सकारात्मक विचारसरणी आपणावपाक जाय. गरज दिसता तेन्ना निवृत्त जाल्ल्या ज्येश्ठ अभियंत्यांचो सल्लो घेयात, तातूंतल्यान तुमची प्रगल्भता वाडटली.
गोंय सरकारांत मुख्यमंत्री, मंत्री आनी हेर पदांचें कामकाज पळयतना आपणें ल्हानांतल्या ल्हान घटकां कडेन बरे संबंद दवरतालों. निवृत्त जाल्ल्या सरकारी अधिकाऱ्यां कडल्यान वेळावेळार सल्ले घेतालों. ताचो फायदो आपल्याक सरकार चलयतना जालो. आयज लेगीत गरज पडटा तेन्ना त्या वेळार आपूण देशभरांत पातळिल्ल्या अभियंत्यांचो आनी सनदी अधिकाऱ्यांचो मुजरत सल्लो घेता. दरेका सरकारी अधिकाऱ्यान अशें केल्यार ताचो तांकां फायदोच जातलो. नोकरी करतना कितें तरी वेगळें करपाचो यत्न करात. तुमच्या वावरांतल्यान तुमची वळख निर्माण जावपाक जाय. निवृत्त जाले उपरांत लेगीत लोकांक तुमच्या वावराचो उगडास येवपाक जाय, अशें मंत्री कामत हांणी सांगलें.
संदीप निगळे हांणी सांगलें, अभियांत्रिकी मळार काम करतना समस्या निर्माण जातल्योच. त्या समस्यां कडेन संदीच्या रुपांत पळयात. त्याच वेळार तुमचे कडल्यान कसली तरी नवी निर्मिती जातली. शिक्षणीक काळांत हुशार थारिल्लो अभियांत्रिकी विद्यार्थी हो बरो अभियंता जातलोच हाची शाश्वती आसना. हाचे उरफाटे कल्पकतेच्या नेटार उणे गूण मेळयिल्ल्या अभियंत्यांनी कल्पने भायलें काम केलां. अभियंतो हो सदांच सजग आसपाक जाय. जंय अभियंते नात थंय उदरगत ना हाचो सार्थ अभिमान बाळगात. अभियांत्रिकी मळार काम करतना आपल्या कामाचो आनंद घेयात. कारण तुमी अभियंते जातलेच हे जिद्दीन हांगा मेरेन पावल्यात, अशें तांणी सांगलें.
पद्माकर शेल्डारकार, सतीश प्रभावळकार, शशिकांत देसाय, प्रसाद पानंदीकार ,डॉ. रघुवीर साळकार ह्या निवृत्त सरकारी अभियंत्यांचो ह्या वेळार मंत्री कामत हांचे हस्तुकीं सत्कार केलो. जाल्यार योगेश शहापूरकर हांकां अंदूंचो उत्कृश्ट अभियंतो हो पुरस्कार भेटयलो. आनंद वाघुर्मेंकार हांणी येवकार दिलो. काशिनाथ सराफ हांणी उपकार मानले. रवीना नायक हांणी सुत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
