भांगरभूंय | प्रतिनिधी
पणजी : जिल्लो पंचायत वेंचणुकेच्यो तारखो आजूनय जरी जाहीर जावंक ना तरी राजकीय पक्षां वतीन तयारेक सुरवात जाल्या. आम आदमी पक्षान तयारे खातीर म्हाल मुखेल्यांची निवड केले उपरांत कॉंग्रेसीनूय उमेदवारांची तपासणी सुरू केल्या.
विधानसभा वेंचणुके खातीर आजूनय देड वर्स आसा. ताचे पयलीं डिसेंबर मेरेन जिल्लो पंचायत वेंचणुको जातल्यो. जिल्लो पंचायत वेंचणुके उपरांत जनतेच्या कौलाचो अदमास राजकीय पक्षांक घेवप शक्य जातलें. ह्या कौला प्रमाण विधानसभे खातीर रणनिती आखप शक्य जातलें. हाका लागून जिल्लो पंचायत वेंचणूक म्हत्वाची थारतली.
राज्य वेंचणूक आयोगान मतदारसंघ फेर रचणुकेक मसुदो सुचवण्यां खातीर उक्तो केला. वेंचणूक आयोगा कडल्यानूय जिल्लो जिल्लो पंचायत वेंचणुकेची तयारी सुरू जाल्या.
कॉंग्रेसीन उमेदवारांची तपासणी करपाक जिल्लो समित्यांची बसका घेतली. दोनूय बसकांक प्रदेश कॉंग्रेस अध्यक्ष अमित पाटकार हजर आशिल्ले. कोणशा कोणशांनी काम करपी आनी कार्यकर्त्यांच्या विश्वासांतल्या मनशांक उमेदवारी दितले, अशें बसकेंत प्रदेश कॉंग्रेस अध्यक्ष अमित पाटकार हांणी स्पश्ट केलें,
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
