भांगरभूंय | प्रतिनिधी
म्हापशें ः कुमया मरड, गिरीच्या राकेश वाघेला हाच्या बंगल्याक उजो लागलो. रांदची कूड आनी बॅडरूम ह्या उज्यांत लासलो. हातूंत तांचें सुमारे 5 लाख रूपयांचें लुकसाण जालें.
ही घडणूक बुधवारा सकाळीं सुमार 10.20 वरांचेर घडली. हे घडणुके वेळार वाघेला कुटूंब कांय कामा खातीर घरांतल्यान भायर सरिल्लें. ह्या बंद घराक अचकीत उजो लागलो. रांदची कूड आनी बॅडरुमांत उजो पातळिल्ल्यान दोनूय कुडींचें सामान लासून गोबोर जालें.
हे घडणुकेची म्हायती मेळटांत म्हापशें उजो पालोवपी दळाचे जवान थंय पावले. ते येता म्हणसर रांदची कूड आनी बॅडरुमांत उजो पातळिल्लो. हाका लागून एसी, खाट, कपडे, आलमार, वीज उपकरणां, भांगराच्यो वस्ती, जेवणाचें सामान आनी हेर सामान लासलें.
म्हापशें उजो पालोवपी दळाचे अधिकारी गणेश गोवेकार, हवालदार सुरज शेटगांवकार, आनंद बांदेकार, परेश मांद्रेंकार, भिकाजी काळोजी आनी संजीव कोरगांवकार ह्या जवानांनी फोमआनी उदक वापरून उजो नियंत्रणांत हाडलो. हाका लागून आनीक लुकसाण जावपा पसून वाटवलें.
शॉर्ट सर्कीट वा दिव्याचे वातीक लागून ही घडणूक घडिल्ल्याचो अदमास वाघेला कुटूंबियांनी उक्तायला. हे घडणुकेचो पंचनामो साळगांव पुलिसांनी केला
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
