मडगांव नव्या ठोक नुस्तें बाजारांत परंपरीक नुस्तेकारांक दिवचें प्राधान्यः पेले

भांगरभूंय | प्रतिनिधी

पणजीः नवें मडगांव ठोक नुस्तें बाजारांत थळाव्या आनी परंपरीक नुस्तेकारांक प्राधान्य दिवचें. रापणकारां खातीर सुवात राखून दवरची, पार्किंग शुल्क रद्द करचें, झेलाची कूड बांदची आनी बरी टॉयलेट सुविधा नव्या मार्केट प्रकल्पांत दिवची, अशी मागणी परंपरीक नुस्तेकार पेले फर्नांडीस हांणी केल्या.

मडगांवां नव्यां ठोक नुस्तें बाजाराच्या उक्तावणा पयलीं नुस्तेंमार खात्यान नुस्तें विकपी एजंट, नुस्तें पोसपी आनी परंपरीक नुस्तेंकारां वांगडा बसका घेवन तांच्यो मागण्यो आयकून घेतल्यो. बसके उपरांतची म्हायती दितना पेले फर्नांडीस उलयताले.
जे रांपणकार रापणेचें नुस्तें विकतात तांकां ठोक बाजारांत सुवात दिवंक ना. आमकां बाजारांत वेगळी सुवात राखून दिवची. भायले ठोक विक्रेते गाडयो घेवन येतात आनी पुराय सुवात आडायतात. जे नुस्तेकार भाव भायर पडल्यात तांचे घरकान्नीक नुस्तें विकपा खातीर सुवात दिवन तांकां तेंको दिवचो. त्यो रापणकारां कडल्यान नुस्तें विकतें घेवन तें बाजारांत येवन विकतात, अशी मागणी पेले हांणी केल्या.
एक परंपरीक नुस्तेंकार जो पिकअप घेवन येता तांकां पार्किंग शुल्क रु. 300 इतलें वराक घेतात. त्या वेळार एसजीपीडीए अध्यक्ष दाजी साळकार हांकां सांगिल्लें, परंपरीक नुस्तेंकार आसात ते उण्यात उणे चार ते स आनी चडांत चड 30 ते 50 पाटले घेवन येतात. हे नुस्तेंकार वर्साचे फक्त चार ते पांच म्हयने नुस्तें मारताय. कायद्या प्रमाण पयशे घेवचे न्हय अशी मागणी केल्ली, अशें पेले हांणी सांगलें.
तशेंच बाजारांत झेलाची कूड बांदपाची आमी मागणी केल्या. जर रांपणकारांच्या नुस्त्याक दर मेळना जाल्यार ठोक विक्रेकार घेतात कोयर्‍याचे कोताचेर नुस्तें विकतें घेवन तें फेक्टरींत घालातात. 90 रु. दर किल सुंगटां खातीर इतले पयशे दिवन ते आमकां सारके फटयतात. देखून झेलाची कूड सारकी गरजेची आनी ही सुविधा उबारपाक खात्यान हयकार दिला, अशें पेले हांणी म्हणलें.
नुस्त्या बाजारांत टोयलेट नाशिल्ल्यान नुस्तेंकार खासा करून बायलां आनी चलयांक त्रास सोसचे पडटात. ह्या नव्या बाजारांत बर्‍यो सुविधा आशिल्ले टॉयलेट घालचे आनी ते खातीर शुल्क घेवचें. तशेंच ह्या बाजाराचो सोपो एकठांय करपाचें कंत्राट पारंपारीक गोंयकार नुस्तेकारांच्या सोसयाटीक दिवचो, अशें पेले हांणी सांगलें.