भांगरभूंय | प्रतिनिधी
पणजी : टॅक्सीकारांक टॅक्सींनी बसोवपी डिजिटल मिटर, प्रिंटर आनी जीपीएस यंत्रणां खंयच्याय विक्रेत्या कडल्यान घेवपाक मेळटली. हे मिटर गोवा मोटर नेम पाळपी आसपाक जाय. ते वजन आनी माप खात्या कडल्यान प्रमाणीत आसप गरजेचें. हे विशीं हालींच येरादारी संचालक प्रविमल अभिषेक हांणी निर्देश जारी केल्यात. ह्यान पयलीं फकत दोन विक्रेत्यां कडल्यान मिटर घेवपाची परवानगी आशिल्ली.
येरादारी खात्याचे सुचवणेंत म्हणलां, गोंय मोटार वाहन नेम 1991 च्या नेम 140 प्रमाण दरेकी मोटार कॅबांत डिजिटल तरेचें भाडें मिटर बसोवप गरजेचें. तशेंच प्रिंटर आनी ग्लोबल पोझिशनिंग सिस्टम (जीपीएस) ट्रॅकिंग डिव्हायज बसोवप गरजेचें. मिटराचेर वजन आनी माप खात्याचें सिल गरजेचें. खात्यान ह्यान पयलीं गोवा इलेक्ट्रॉनिक्स लिमिटेड वरवीं भाडें मिटर बसोवपा खातीर दोन विक्रेत्यांची निवड केल्ली.
मात विवीध टॅक्सीकारांनी फकत दोन विक्रेत्यांच्या जाग्यार खंयच्याय विक्रेत्यां कडल्यान मिटर बसोवपाचो पर्याय दिवपाची मागणी केल्ली. हाचो विचार करून हो निर्णय घेतला.
तशेंच भौशीक वाहनांत व्हेईकल लोकेशन ट्रॅकिंग डिव्हायज आनी आपत्कालीन बटन बसोवपूय गरजेचें. हीं दोनूय यंत्रणांय खंयसरूय विकत घेवपाची परवानगी दिल्या. मात हें बसोवपाचें काम अधिकृत डिलरा कडल्यानूच करचें पडटलें. वाहनांची फिटनेस चाचणी हीं दोनूय यंत्रणां तपासतलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
