भांगरभूंय | प्रतिनिधी
बाशुदेव भंडारी बेपत्ता प्रकरण
पणजी: सांतइस्तेंव जुंव्या वेल्या आखाडो फेरी धक्यार न्हंयेंत मोटार वचून बेपत्ता जाल्लो बाशुदेव भंडारी (गुजरात) ह्या तरणाट्याचो सदोश मनीसवध प्रकरणांत गुन्यांव फांट्यान अब्यास झैदी आनी शरीफ शाह ह्या दोगां दुबावितां आड पणजेंतल्या पयलो वर्ग न्यायालयांत 279 पानांचें आरोपपत्र दाखल केलां. तातूंत 77 साक्षिदारांची साक्ष नोंद केल्या. ह्या प्रकरणाची दखल घेवन न्यायालयान फुडली सुनावणी 20 सप्टेंबर दिसा दवरल्या.
गुजरातचो बाशुदेव भंडारी सांखळे मॅनेजमेंट कॉलेजीचे विद्यार्थिनीक मेळपा खातीर गोंयांत आयिल्लो. तीं दोगांय आयतारा 1 सप्टेंबर 2024 दिसा मध्यानरातीं 12.45 वरांचेर रेंट अ कार घेवन सांखळे सावन हणजूण्यां वतालीं. ह्याच वेळार माशेलांत तांचे मोटारीन दुसरे एके मोटारीक धक्को दिलो. त्या मोटारीन तांचो फाटलाग केलो. ते मोटारी पसून वाटावपाच्या यत्नांत ते आखाडा सांतइस्तेंव हांगासरले फेरी धक्यार पावले.
काळखांत रस्त्याचो अदमास येवंक नाशिल्ल्यान गतीन आयिल्ली मोटार सरळ न्हंयेंत गेल्ली. प्रसंग वळखून मोटारींतल्यान दोगांनीय भायर सरून जीव वाटावपाचो यत्न केलो. तरणाटी सुखरुप देगेर आयली. पूण गुजरातचो बाशुदेव भंडारी हाका पेंवपाक येनाशिल्ल्यान न्हंयंत बुडिल्लो. उपरांत पोरणें गोंय पुलिसांनी दर्यादेग पुलीस, उजो पालोवपी दळ आनी नौदळाच्या जवानांची मजत घेवन ताचो सोद घेवपाचो यत्न केल्लो. पूण ताचो पत्तो लागलो ना.
ह्या प्रकरणांत पोरणें गोंय पुलिसांनी सदर मोटारीचो सोद घेवन अब्यास झैदी आनी शरीफ शाह ह्या दोगां आड कारवाय केल्ली. उपरांत कुटुंबांनी केल्ले मागणे प्रमाण सरकारान हें प्रकरण पोरणें गोंय पुलिसां कडल्यान गुन्यांव फांट्या कडेन वर्ग केलें. ह्या प्रकरणांत गुन्यां फांट्याचे पुलीस निरिक्षक तुषार लोटलीकार हांणी तपास पुराय करून वयल्या दोगां दुबावितां आड बेपत्ता बाशुदेव भंडारी हाच्या सदोश मनीसवध प्रकरणांत 77 साक्षिदारांची साक्ष नोंद करून पणजेंतल्या पयलो वर्ग न्यायालयांत 279 पांनाचें आरोपपत्र दाखल केलां.
ह्या प्रकरणाची न्यायालयान दखल घेवन फुडली सुनावणी 20 सप्टेंबराक दवरल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
