भांगरभूंय | प्रतिनिधी
दुबाविताक अटक; जखमीचेर गोमॅकाँत उपचार सुरू
म्हापशें: शापोरा माथे साईराम (27) ह्या तेलंगणच्या पर्यटकाचेर कोयत्यान तशेंच धारीच्या हत्यारान जिवघेणो हल्लो केलो. ह्या प्रकरणांत हणजूण पुलिसांनी साहील साऊद हसन बापू (23, रा. दाभोळवाडो, शापोरा) हाका अटक केल्या. जखमीचेर गोमॅकाँत उपचार सुरू आसात.
ही घडणूक काल (मंगळारा) सकाळीं 6.30 वरांच्या सुमाराक शापोरा हांगासरल्या अवतारा बार अॅण्ड रेस्टॉरंण्टा कुशीक घडली. ह्या प्रकरणांत पिडीत साईराम हाचो इश्ट मोहम्मद मुल्ला (रा. कर्नाटक) हाणें पुलिशेंत कागाळ नोंद केल्या.
हल्ल्यांत धारेच्या हत्याराचे घाव जखमीचे तकलेर लागिल्ल्यान गंभीर रक्तस्राव जालो. रोखडोच जखमीक 108 अॅम्बुलन्सींतल्यान म्हापशेंच्या जिल्हो हॉस्पिटलांत दाखल केलो. थंय सावन ताका गोमॅकाँत हालयलो. थंय ताचेर उपचार सुरू आसून ताची भलायकी हुस्को करपा सारकी आसा.
दुबावीत आनी जखमी एकामेकांक वळखय नाशिल्ले. ताका लागून खंयच्या कारणाक लागून हो हल्लो जालो हें अजून स्पश्ट जाल्लें ना. जखमीच्या जबानी उपरांतूच हल्ल्या फाटलें कारण समजतलें. जाल्यार पिडीत जखमी मोथे साईराम हो आपल्या घरा कुशीक आयिल्लो. ताका लागून ते तिडकीतल्यान ताचेर आपणे हल्लो केल्ल्याचें कारण दुबावितान पुलिसांक सांगलें.
ह्या प्रकरणांत पुलिसांनी भान्यासंच्या 109(1) कलमा खाला खुनी हल्ल्याचो गुन्यांव नोंद केला आनी दुबाविताक अटक केल्या. फुडलो तपास पुलीस निरिक्षक सुरज गांवस हांच्या मार्गदर्शना खाला उपनिरिक्षक नवनीत गोलतेकार करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
