भांगरभूंय | प्रतिनिधी
पणजी : गोंयचे खाद्य संस्कृतींत विवीध रुचीक आनी विंगड विंगड तरांच्या जेवणां खाणांचो आसपाव आसा. गोंयांत देशाची जेवणां खाणांची राजधानी जावपाची तांक आसा. हाका लागून नॅशनल रेस्टॉरंट असोसिएशन ऑफ इंडियान (एनआरएआय) नवी कल्पना मुखार हाडची अशें पर्यटन मंत्री रोहन खंवटे हांणी म्हणलें. मंगळारा पणजे आयोजीत परिशदेक ते उलयताले.
ह्या वेळार संघटणेचे सागर दर्यानी, प्रल्हाद सुखठणकार आनी हेर पदाधिकारी हजर आशिल्ले. मंत्री खंवटे हांणी मुखार उलयतना म्हणलें, गोंय फकत सी, सँड अण्ड सन पुरतेंय मर्यादीत उरचें न्हय म्हूण आमी खात्या वतीन जायते यत्न करतात. ‘गोवा बीयोंड बीच’ हाकाय येस येता. आयज गोंयांत अध्यात्म, अॅडव्हेंचर, भलायकी पर्यटना खातीरूय पर्यटक येतात. अशावेळार गोंयचे इंडो पुर्तुगेज, सारस्वत वा परंपरीक भारतीय पद्धतीचें अस्सल जेवण पर्यटकांक तशेंच खाद्यमोगींक आकर्शीत करपाक शकता. गोंयचीं रेस्टाॅरंटां आनी बरीं करपा खातीर एनआरएआयन मार्गदर्शन करचें.
सध्या संवसारभर जेवण खाणाचो हो विशय म्हत्वाचो जाला. आमचे पिळगे सयत, जनरेशन झी, अल्फा हांकांय नवेनवे जिन्नस खावपाक आवडटा. ही पिळगी नव्या खावपाच्या जिन्नसांचो सोद घेत आसता. गोंयांत आसगांव, हणजुणें वा दक्षीण गोंयांत खंयसरूय गेल्यार दरेके सुवातेर तुमकां बर्या दर्जाचे शितकडये सयत संवसारीक पांवड्यावेले नामनचे जिन्नस खावपाक मेळटात. गोंयच्या मास्टरशेफानूय गोंयांक संवसारीक पांवड्यार वळख करून दिल्या, अशें मंत्री खंवटे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
