भांगरभूंय | प्रतिनिधी
पणजी : गोंय वैजकी महाविद्यालयांत (गोमेकॉ) विवीध ६६ सुवातांचेर भरती करतले. हातंतल्यो १८ सुवातो एका वर्साच्या कंत्राटी तत्वाचेर भरती करतले. जाल्यार उरिल्ल्यो ४८ सुवातो ह्या रजा काळांतलीं रितीं पदां आसात. सगल्यांत चड ४० सुवातो ह्या स्टाफ नर्स रजा रित्या पदांच्यो आसात. विवीध सुवातां खातीर २२ ते २४ सप्टेंबर मजगतीं प्रत्यक्षां मुलाखती घेतले.
स्टाफ नर्स पदा खातीर २३ सप्टेंबराक सकाळीं १० वरांचेर गोमेकॉंच्या लेक्चर सभाघरांत सरळ मुलाखती जातल्यो. हे खातीरूच उमेदवारांनी गरजेच्या कागदपत्रां सयत सकाळीं ९.३० वरांचेर हजर रावप गरजेचें. हाका ४४,५०० रुपया म्हयन्याक पगार आसतलो. बीएससी नर्सींग आनी हेर समतुल्य पद्वी आसप गरजेचें.
अनेस्थेटीक्स सहाय्यकांचीं ५ पदां एक वर्साच्या कंत्राटार भरतले. हे खातीर म्हयन्याक २७,१२० रुपया पगार दितले. उमेदवारां कडेन बीएससी प्राणी वा वनस्पती शास्त्र पद्वी आसप गरजेचें. कनिश्ठ कॅथ लॅब तंत्रज्ञाच्या ४ सुवातां खातीर बीएससी कार्डीयाक केअर पद्वी आसप गरजेचें. ह्या पदा खातीर ३५ हजार रुपया पगार दितले.
तशेंच लॅब तंत्रज्ञाच्याच्यो हेर ४ सुवातो, स्पीच लँग्वेज पॅथोलोजिस्टच्यो ३, ऑडीयोलॉजिस्टच्यो २ सुवातो कंत्राटी तत्वार भरतले. जाल्यार फिजिओथेरपिस्टच्यो २, एलडीसीच्यो २, मेडिको सोशलवर्करची १, कनिष्ठ तंत्रज्ञांच्यो २ ते डायलेसीस तंत्रज्ञांची १ सुवात रजा काळांतल्या रित्या पदांच्या स्वरुपांत भरती करतले. सगल्या पदां खातीर पिरायेची मर्यादा ४५ वर्सां आसतली. सगल्या उमेदवारांक कोंकणी भाशेचें ज्ञान आसप गरजेचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
