भांगरभूंय | प्रतिनिधी
-गोंयांत क्रूझ पर्यटन हंगाम सुरूवास्कोः कॉर्डेलिया एम्फ्रेस ही देशांतर्गत क्रूझ 10 तारखेक 1050 प्रवाशांक घेवन मुरगांव बंदरांत दाखल जाल्ल्यान गोंयांत क्रूझ पर्यटन हंगाम सुरू जाला. कांय देशी आनी आंतरराष्ट्रीय क्रूझ लायनरांनी फुडल्या काळांत ह्या हंगामांत गोंयाक भेट दिवपाची तयारी दाखयल्या. हाका लागून गोंयच्या पर्यटन वेवसायाक उर्बा मेळपाची शक्यताय आसा.
ह्या हंगामांत 31 देशी आनी 12 आंतरराष्ट्रीय क्रूझ लायनरांनी गोंयाक भेट दिवपाची तयारी दाखयल्या अशें मुरगांव बंदर प्राधिकरणाचे प्रभारी जेरोम क्लेमेंट हांणी सांगलें. गोंयांत चड क्रूझ लायनर हाडपाचे आमचे यत्न चालू आसात. आनीक 10 आंतरराष्ट्रीय क्रूझ ऑपरेटरां कडेन चर्चा सुरू आसा. तांच्या प्रवास कार्यावळींत गोंयचोय आस्पाव करूं येता अशें तांणी सांगलें. क्रूझ सीझन सुरू जाल्ल्यान आतां गोंयच्या पर्यटन क्षेत्राक व्हड उर्बा मेळटली. जाका लागून थळावे वेवसायीक, वेगवेगळे येरादारी संचालक आनी हेरांक फायदो जातलो. क्लेमेंटान सांगलें.
कोर्डेलिया सम्राज्ञी मुरगांव बंदराचेर पावतकच पर्यटकांक परंपारीक पद्दतीन येवकार दिलो. ह्या निमतान लोकनाच सादर केलो. तातूंत कांय पर्यटकांनी वांटो घेतलो आनी लोकनाचाचो आस्वाद घेतलो. कॉर्देलिया सम्राज्ञीचेर येवपी पर्यटक गोंयांत आयले. ते उपरांत परत येवपाच्या प्रवासांत सुमार 985 प्रवासी लक्षद्वीपाक वचपी क्रूझांत बसले अशी म्हायती क्लेमेंटान दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
