भांगरभूंय | प्रतिनिधी
पूण तिचो गैरवापर केलो जाल्यार ती समाजा खातीर आनी मनशाच्या अस्तित्वा खातीर धोको निर्माण करूंक शकता. ते खातीर…..
आयचें यूग हें तंत्रगिन्यानाच्या मळार उदरगतीक पाविल्लें. हे उदरगतीचो एक प्रभावी भाग म्हणल्यार कृत्रीम बुद्धी, म्हणजेच एआय. ही संकल्पना फकत विज्ञानाच्या, तंत्रगिन्यानाच्या मळारूच मर्यादीत नासून ती आयज आमचे दीसपट्टे जिणेंच्या मुळांत रुजल्या. हे उदरगतीन आमकां जायत्यो संदी दिल्याच आसतल्यो, पूण ताचेच जोडयेक अनेक गंभीर प्रकाराचे प्रस्न लेगीत भौसां मदीं निर्माण केल्यात. ह्या कारणांक लागून आयज विचार करपाची खर गरज आसा ती म्हणल्यार, कृत्रीम बुद्धी ही एक संद का धोको?
कृत्रीम बुद्धीमत्ता म्हणल्यार संगणक वा मशीनाक मनशां प्रमाण विचार करपाक लावप – कसलेंय निर्णय वा समस्या सोडपाची विचारशक्त प्राप्त करून दिवप…. म्हणल्यार मशीन आपूण शिकून विश्लेशण करता आनी आपली कार्यपद्धत सुदारता. चॅटबॉक्स, फेस रॅकग्निशन, भाशांतर यंत्रणां, सेल्फ ड्रायव्हिंग गाड्यो, हे सगळे एआय चीच देख.
एआय च्या मजतीन आयज कांक्राचें दुयेंस, काळजाचें दुयेंस ह्या सारक्या व्हड दुयेंसांची वळख जाता. ते खातीर दोतोरांक लेगीत अचूक प्रमाणांत आनी कमी वेळांतूच दुयेंतीचेर उपचार करपाक मजत जाता. एआय आधारीत ऍप्स विद्यार्थ्यांक तांचे गती-प्रमाण शिकून घेवपाची संद दिता. हे खातीर वैयक्तीक शिकोवपाची गरज लेगीत उणी जाता. जाका लागून शिक्षक चड सर्व- समावेशक जातात. स्वयंचलीत यंत्रणे खातीर (रोबोटे आनी एआय) उद्देग चड कार्यक्षम जाला. गिरायक – सेवा उत्पादन वेवस्थानांत खूब बदलूय जाल्यात. एआयचो वापर करून हवामान खात्याचे अचूक अदमास, पिकांची योग्य म्हायती आनी कीड नियंत्रणाच्या विशीं शेतकाऱ्यांक खूब मजत मेळटा.
पूण आयज एआयक लागून खूब धोके आनी भंय निर्माण जाला. सगळ्यांत व्हडलो धोको म्हणजे रोजगाराचेर जाल्लो परिणाम. आयज अनेक अश्यो नोकऱ्यो एआय खातीर लोकांच्या हातांतल्यांत सुटत गेल्यात. आयज सामान्यांतलें सामान्य काम लेगीत हो एआय करतना आमकां दिसूंक लागलां. बँकिंग, ग्राहक- सेवा, उत्पादन तशेंच शिक्षणीक क्षेत्रार लेगीत ह्या एआयन आपलें सर्वस्व गाजयलां. एआय सिस्टमां खातीर व्हड प्रमाणांत डेटा गरजेचो आसता आनी हो डेटा जर चुकीच्या हातांत सांपडलो जाल्यार वैयक्तीक म्हायती, अर्थीक वेव्हार संबंदीत डेटा लीक जावंक शकता. भविश्यांत हो एआय जर मनशाच्या हाताभर वचत जाल्यार ताचे खूब वायट परिणाम आमकां सोंसचें पडटले. हातूंतच नित्तीमतेचे प्रस्न उप्रासतात – एआयन कसल्यो गजाली शिकच्यो, ताका कितलें स्वातंत्र्य दिवचें ताची जाप वा निर्णय कितले प्रामाणीक आसात? ह्या सगळ्यां आव्हानांक जाप दिवंक कांय उपाय गरजेचें आसात.
नवे पिळगेक एआय आधारीत संसारांत जगपाक दोनूय परीन मानसिकतायेंत आनी शारिरीकतायेंत तयार करपाची गरज आसा. आपणें खंय तोंड उगडचें, खंय न्हय हाची बुद्धी भुरग्यांक आसूंक जाय. शिक्षणाच्या मळार विश्लेशण, प्रोग्रामींग, आनी विज्ञानाचेर, तंत्रगिन्यानाचेर भर दिवचो. सगळ्यांत म्हत्वाचें म्हणल्यार नैतीक मुल्यांचो समावेश- एआय प्रणालींत न्याय, सातत्य, समानता आनी भावनांचेर विचार करप म्हत्वाचें. कृत्रीम बुद्धी म्हणल्यार दुधारी तलवारा वरीं, तिचो फावे तसो वापर केलो जाल्यार मानसीक ताण उणो जावं येता आनी जिवीत अधीक सुरक्षीत आनी समृद्ध जावं येता. पूण तिचो गैरवापर केलो जाल्यार ती समाजा खातीर आनी मनशाच्या अस्तित्वा खातीर धोको निर्माण करूंक शकता. ते खातीर तंत्रगिन्यानाचेर विस्वास दवरतना विवेकबुद्धी लेगीत जागरूत दवरप आजचा काळांत आनी युगांत खूब म्हत्वाचें.
– स्वेद सदानंद दिवकार
70208 54216
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
