भांगरभूंय | प्रतिनिधी
उमेदवारांचे हाजेरींत मतां मेजतले
पणजी : गोवा क्रिकेट संंघटणेचे अध्यक्ष आनी हेर पदांं खातीर मंगळार, १६ तारखेर वेंचणूक जातली. जीसीएचेर कोण आपलें वर्चस्व गाजयतले हें फाल्यां थारतलें. भाजप समर्थक परिवर्तन पॅनल आनी चेतन देसाय पॅनलांत सरळ वेंचणूक जातली. अध्यक्षपदा खातीर महेश कांंदोळकार आनी महेश देसाय हे दोनूच उमेदवार आखाड्यांत देंवल्यात.
वेंचून आयल्यार २०२७ मेरेन मावळींग्यां क्रिकेट स्टेडियम उबारतले अशें आस्वासन परिवर्तन पॅनलान दिलां. सगले परवाने मेळ्ळ्यार स्टेडियम खंयचेय सुवातेर उबारप सहज शक्य आसा, अशी जाप चेतन देसाय हांच्या पॅनलान दिली. दोनूय पॅनलांच्या उमेदवारांनी मतदान करपी सगल्या क्लब्सांच्या वांगड्यांची भेट घेतली. वेंचणुकेंत १०७ क्लबांचे वांगडी मतदान करतले.
सकाळीं मतदान जाले उपरांत साजेच्या ४ वरांचेर मतां मेजपाक सुरवात जाती. उमेदवारांंचे हाजेरींत मतां मेजतले. खंयचेय परिस्थितींत मतांची परत मेजणी जावची ना. दोगां उमेदवारांंक समान मतां मेळ्ळ्यार लॉटरीचे पद्धतीन निकाल जाहीर करतले, अशें वेंचणूक अधिकारी ए. के. ज्योती हांणी कळयलें.
जीसीए वेंचणुकेंतले उमेदवार :
अध्यक्ष : महेश देसाय आनी महेश कांंदोळकार
उपाध्यक्ष : परेश फडते आनी राजेश पाटणेकार
सचीव : दया पागी, हेमंंत पै आंंगले आनी तुळशीदास शेट्ये
सहसचीव : अनंत नायक आनी सुशांंत नायक
भांडारी : रूपेश नायक आनी सय्यद माजीक
वांगडी : महेश बेहकी आनी मेघनाथ शिरोडकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
