भांगरभूंय | प्रतिनिधी
म्हादय बचाव अभियानाची मागणी
पणजीः म्हादयची सुनावणी सर्वोच्च न्यायालयांत येवपा खातीर खासा यत्न करचे. तशेंच म्हादयचें उदक घुंवडावपाच्या कळसा- भांडुरा प्रकल्पाचें हवाई सर्वेक्षण करचें, तशेंच केद्रीय पर्यावरण मंत्र्या वांगडा भेट घडोवन हाडपाची मागणी म्हादय बचाव अभियानाच्या शिष्टमंडळान मुख्यमंत्र्यां कडेन केल्या. जाल्यार शिश्टमंडळान केल्ल्यो सगल्यो मागण्यो विचारांत घेतले अशें आस्वासन मुख्यमंत्री डॉ. प्रमोद सावंत हांणी दिलें.
म्हादयच्या विशयावेल्यान म्हादय बचाव अभियानाच्या शिष्टमंडळाची डॉ. सावंत आनी उदका स्रोत मंत्री सुभाष शिरोडकार हांचे वांगडा मंत्रालयांत बसका जाली. ह्या वेळार म्हादय बचाव अभियानाचे निमंत्रक निर्मला सावंत, पर्यावरण मोगी प्रा. राजेन्द्र केरकार आनी प्रजल साखरदांडे हाजीर आशिल्ले.
ह्या वेळार उलयतना केरकार हांणी सांगलें, कितलेशेच खेपे म्हादयचें प्रकरण सर्वोच्च न्यायालयांत येता. मात सुनावणी जायना. न्यायालयांत म्हादय सुनावणेक येवपा खातीर विशेश यत्न करचे आनी दिल्लीच्या आदोगांदाचो सल्लो घेवचो.
कळसा भांडुरा प्रकल्पाचो हवाई सर्व्हे करचो. तशेंच शिष्टमंडळाक घेवन ह्या प्रकल्पाची पळोवणी घडोवन हाडची. जर सरकाराक ही पळोवणी घडोवपाक जमना जाल्यार आमी शिष्टमंडळ स्वता प्रकल्प सुवातेर वचून भेट दितले आनी ते खातीर सरकारान आमकां पुलीस राखण दिवची, अशी मागणी केरकार हांणी केली.
ते भायर म्हादय बचाव अभियान हांच्या शिष्टमंडळाची केंद्रीय पर्यावरण मंत्री भुपेंन्द्र यादवा हांचे कडेन भेट घडोवन हाडपाची मागणी आमी डॉ. सावंत हांचे कडेन केल्या. हे भेटींत म्हादय विशींचे कांय महत्वाचे मुद्दे आमकां तांचे मुखार स्पश्टपणान मांडपाक जाय. ह्या तीन मांगण्यांचेर मुख्यमंत्र्यान आमकां सकारात्मक प्रतिसाद दिला, अशें केरकार हांणी म्हणलें.
म्हादयचें प्रकरण बेगीनचे बेगीन सुनावणे खातीर घेवचें अशी मागणी आमी न्यायलाया मुखार करतले, अशें मंत्री सुभाष शिरोडकार हांणी सांगलें. जेन्ना म्हादय प्रकल्पाचो एरीयल सर्व्हे करपाचो विशय येता तेन्ना मुख्यमंत्री कर्नाटक सरकारा कडेन उलयतले वा तांकां पत्र बरयतले, अशेंय तांणी सांगलें.
म्हादय विशीं आमी सामके गंभीर आसात. जे विशय म्हादय बचाव अभियानाच्या शिश्टमंडळान मांडल्यात ते सगळे विचारांत घेतल्यात. जेन्ना प्रकल्पाच्या थळाक भेट दिवपाचो प्रस्न येता तेन्ना तांकां म्हादय प्रवाहाची मान्यताय जाय पडटा, अशें मुख्यमंत्री डॉ. सावंत हांणी बसके उपरांत सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
