भांगरभूंय | प्रतिनिधी
पणजीः आदले मुख्यमंत्री लक्ष्मीकांत पार्सेकार हांणी भाजपांत घरवापसी करपाचे स्पश्ट संकेत दिल्यात. हांव भाजप प्रवेशाक तयार आसां. मात पयलीं भाजपांत येवकार दिवपाचो प्रस्ताव येवंदी, अशी घोशणा लक्ष्मीकांत पार्सेकार हांणी केली.
मंत्रालयांत मुख्यमंत्री डॉ. प्रमोद सावंत हांची भेट घेतले उपरांत पार्सेकार पत्रकारांकडे उलयातले.
म्हजे घरवापसी विशीं घराचे (पक्षाचे) मुखेलींक विचारपाक जाय. म्हजेकडेन जर घरवापसीचो प्रस्ताव आयलो जाल्यारूच ताचेर विचार करतले. जर भाजपाक येवकाराचो प्रस्ताव आयलो जाल्यार, हय हांव भाजपांत परत येवपाक तयार आसां, अशें पार्सेकार हांणी सांगलें.
घरवापसी करपाक उशीर जालो अशें काय ना. दरेक गजाली खातीर एक थारावीक वेळ आसता. आमी म्हूर्त पळयतात आनी ज्यो गजाली जावच्यो आसतात त्यो त्या म्हुर्ताकच जातात, अशें स्पश्टीकरण पार्सेकार हांणी दिलें.
मांद्रें मतदारसंघांत भाजपाची स्थिती सध्या कशी आसा हें पत्रकारांच्या प्रस्नाक जाप दितना पार्सेकार हांणी सांगलें, हांव घरा भायर आसा देखून घराचेर वक्तव्यां करप हें सारकें न्हय. घरवापसी उपरांत म्हजेर कितेंय जापसालदारकी दिल्यार तेन्ना ताचेर भाश्य करतलों. म्हाका कोणें घरांतल्यान भायर मारूंक ना देखून म्हजो कोणाचेर राग ना.
चवथीक मांद्रेचे आमदार जीत आरोलकार आनी पार्सेकार हांचे वांगडा बसून जेवपाचो फोटो व्हायरल जाले उपरांत राजकी चर्चाक नेट आयिल्लो. ह्या फोटो विशीं पार्सेकार हांणी स्पश्टीकरण दिलां.
चवथीक जीत आरोलकार आमच्या घरा आयिल्लो तेन्ना त्या वेळार हांव जेवपाक वतालों. तेन्नाच जिताक हांवें जेवपा खातीर आमंत्रण दिलें आनी ताणें तें स्विकारून तो म्हजे वांगडा जेवपाक बसलो. तेन्ना जिताच्या मनशान शिटूकसाणेन फोटो काडून तो व्हायरल केलो, अशें पार्सेकार हांणी सांगलें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
