भांगरभूंय | प्रतिनिधी
पणजी : सोमारा राज्यांत पावसाक अचकीत नेट आयलो. विवीध भागांत सांजेवेळा मेरेन मध्यम ते घोग्यांनी पावसाची नोंद जाली. हवामान खात्यान फाल्यांय (१५ सप्टेंबर) पावस नेटान पडपाची शक्यताय उक्तायत येलो अलर्ट जारी केलो. जाल्यार १७ ते २१ सप्टेंबर मजगतीं पावस बारीक शिरशिरपाची शक्यताय आसा. ह्या पांच दिसां खातीर पावसाचो कसलोच अलर्ट दिवंक ना.
पणजे सोमारा सकाळीं सावन पावस सुरू जालो. सेगीत पडपी पावसाक लागून कांय रस्त्यांचेर उदक सांठून उरलें. कांय रस्त्यांचेर पावसाक लागून येरादारी कोयंडी जाली. पावस आनी थंड वार्याक लागून चडांत चड तापमान देंवलो. पणजे चडांत चड ३०.४ अंश आनी उण्यात उणो २४.२ अंश सेल्सिअस तापमानाची नोंद जाली. मुरगांवचो चडांत चड कमाल तापमान ३० अंश आनी उण्यात उणो तापमान २४.२ अंश सेल्सिअस उरलो.
राज्यांत १ जून ते १५ सप्टेंबर मजगतीं सरासरी
११६.७६ इंच पावसाची नोंद जाली. अंदूं पावसाचें प्रमाण सरासरी परस ३.६ टक्क्यांनी चड आसा. हाचे मजगतीं सांग्यार१५४.२५ इंच, धारबांदोड्यां १५२.६० इंच, वाळपय १५० इंच, केप्यां १४२.३८ इंच, फोंड्यां १२४.७७ इंच, सांखळे १२०.७० इंच, पेडण्यां ११४.४० इंच, काणकोणा १११.९५ इंच, पोरणें गोंयां ११०.७६ इंच जाल्यार म्हापश्यां ९८.४२ इंच पावसाची नोंद जाली.
नुस्तेकारांक शिटकावणी
राज्यांत १५ ते १९ सप्टेंबर मजगतीं वार्याचो वेग वराक ४० ते ६५ किमी मेरेन पावपाची शक्यताय आसा. हाका लागून वयल्या काळांत नुस्तेंमार्यांनी दर्यांत देवचें न्हय असो उलो हवामान खात्यान मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
