भांगरभूंय | प्रतिनिधी
चेन्नय, खबरां संस्था: तामिळनाडूच्या मध्यवर्ती बंदखणींतल्या कैद्यां मदीं जावपी वाद बंद जाल्यात. विशेश म्हणल्यार ज्या कैद्यांक पयलेच फावट ख्यास्त जाली तांचे मदीं व्हड बदल दिसून येता. तांकां आपल्या गुन्यांवा विशीं आनीक पश्चाताप जावपाक लागला आनी स्वता मदीं सुदार हाडपाची इत्सा तांच्यांत वाडल्या. जांकां आपली जीण सोंपली अशें दिसतालें, ते आतां जेलींत नवी कुशळटाय शिकतात. हे बदल ऑगस्ट २०२४ सावन तामिळनाडूच्या सगल्या णव सेंट्रल जेलींत सुरू आशिल्ल्या ‘कोंडुकुल वनम’ म्हणल्यार ‘बंदखणींत मळबावरीं सपनां’ हे येवजणेक लागून जाल्यात. हे येवजणे खाला तामिळनाडूच्या मध्यवर्ती बंदखणींतल्या सगल्या सुशिक्षीत कैद्यां खातीर पुस्तकां वाचप सक्तीचें केलां. तांच्या वाचनाचेर नदरूय दवरल्या. कोईम्बतूर मध्यवर्ती बंदखणीचे अधीक्षक सेंथिल कुमार हांणी सांगलें, चडशे कैदी राग वा परिस्थितीक लागून गुन्यांव करतात.
जेलींत कैदी ताण आनी चिंतेक लागून एकामेकां कडेन झगडटाले वा नवो गुन्यांव करपाचो प्लॅन करताले. मात लायब्ररी सुरू जाल्ल्याक परिस्थिती बदल्ल्या. कैदी आतां चडसो वेळ पुस्तकां वाचतात. लायब्ररी सकाळीं ९ ते सांजेवेळार ४:३० वरां मेरेन उक्ती आसता. दरेका कैद्याक एका वेळार दोन पुस्तकां दितात. कांय कैद्यांक पयलेच फावट साहित्याची वळख जाल्या. जाल्यार कांय जाण परत एक फावट वाचपाचे उमेदीन आसात. आतां हांगा वाचन ही कैद्यांची संवय जावन पडल्या. हे खातीर सगल्यांत पयलीं राज्यांतल्या सगल्या सेंट्रल जेलींनी बरी लायब्ररी तयार केली. कांय पुस्तकां जेलीन विकत घेतलीं. जाल्यार लोकांनी हजारांनी पुस्तकां दान केलीं. जेल विभागान पुस्तक मेळ्ळें आनी प्रदर्शनां, कॅम्प लावन लोकां कडल्यान बंदखणी खातीर पुस्तकां मागयलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
