भांगरभूंय | प्रतिनिधी
पणजी : कोंकणी समाजाची पालक संस्था अखील भारतीय कोंकणी परिशदेन (एआयकेपी) अंदूं केरळांत जावपी अखील भारतीय कोंकणी साहित्य संमेलनाची कार्यावळ थारावपा खातीर मुळावी बसका घेतली. परिशदेचे कार्यकारी अध्यक्ष चेतन आचार्य हांचे अध्यक्षते खाला एर्नाकुलमांतल्या श्रीनिवास रेसिडेन्सींत ही बसका आयोजीत केल्ली. 22 आनी 23 नोव्हेंबराक एर्नाकुलम शारांत ही परिशद घेवपाचें थारायलें.
हे बसकेंत संमेलनाची संभाव्य सुवात, रावपाची वेवस्था आनी हेर गजालींचेर चर्चा जाली. ह्या वेळार आचार्य हांचे सयत उपाध्यक्ष पी. एन. कृष्णन, भांडारी एच. एम. पेर्नाल, कार्यकारी वांगडी अनंत अग्नी आनी सल्लागार आनंद कामत हाजीर आशिल्ले. अखील भारतीय कोंकणी परिशदेच्या पदाधिकाऱ्यां वांगडाच साहित्य अकादेमी पुरस्कार फावो जाल्ले आनी कोंकणी भाशा सल्लागार मंडळाचे निमंत्रक मेलविन रॉड्रिग्ज, साहित्य अकादेमी पुरस्कार फावो जाल्ले गोकुळदास प्रभू आनी श्री आर. एस. भास्कर, कोंकणी साहित्य अकादेमी केरळाचे वांगडी सचीव नवीन कुमार आनी सुमार 30 नामनेचे कोंकणी कार्यकर्ते हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
