भांगरभूंय | प्रतिनिधी
सां जुझे दी आरीयाल ग्रामसभेंत नागरिकांची मागणी
मडगांव : छत्रपती शिवाजी महाराजांच्या पुतळ्याच्या उबारणी प्रकरणांत मायणा-कुडतरी पुलिसांनी थळाव्यांचेर दाखल केल्ले गुन्यांव बेगोबेग फाटीं घेवचे, अशी मागणी सां जुझे दी आरियाल ग्रामसभेंत नागरिकांनी केली. ह्या वेळार हातांत काळो कपडो आनी निशेधाचे तक्टे घेवन नागरिकांनी आपली तिडक उक्तायली.
फाटल्या वर्सा सां जुझे दी आरीयाल हांगा शिवाजी महाराजांचो पुतळो उबारतना, नागरिकांनी ताका विरोध केल्लो. रस्तो नासतना दुसर्यांचे खाजगी मालमत्तेंतल्यान मार्ग काडून हो प्रकार फक्त जमीन हडप करपा खातीर सुरू आशिल्ल्याचो आरोप करीत थळाव्यांनी आंदोलन केल्लें. ह्या प्रकरणांत मायशा-कुडतरी पुलिसांनी सां जुझे दी अरीयाल आनी हेर भागांतल्या २७ जाणांचेर न्यायालयांत आरोपपत्र दाखल केलें. आयतारा जाल्ले ग्रामसभेंत हाचेर चर्चा जाली. हे चर्चेंत आमदार क्रुझ सिल्वा हे हाजीर आशिल्ले.
ह्या वेळार पीटर व्हिएगस हांणी सांगलें, थळाव्यांनी पुतळ्याक न्हय, तर तो उबारपाचे बेकायदेशीर पद्धतीक विरोध केल्लो. हे जमनी कडेन वचपाक वाट नासूनय ती करताले. पूण पुलिसांनी विरोध करपी थळाव्या आदिवासी भावांचेरुच गुन्यांव दाखल करून तांकां सतावपाचो यत्न केलो. सरकारान हे गुन्यांव फांटी घेवपाचें आस्वासन दिल्लें. मात तशें जावंक ना.
फ्रेडी ट्राव्हासो हांणी म्हणलें, थळाव्यांनी हें आंदोलन फकत जमनी वाटावपा खातीर केल्लें. तातूंत कसलोच वैयक्तीक स्वार्थ नाशिल्लो. हाका लागून आतां पंचायत आनी आमदारांनी विवीध पांवड्यार यत्न करून हे गुन्यांव फाटीं घेवचे.
हाचेर आमदार क्रुझ सिल्वा हांणी प्रतिक्रिया दितना म्हणलें, थळाव्यांवेले गुन्यांव फाटीं घेवपाची मागणी जिल्लोधिकारी, पुलीस अधीक्षक आनी हेर पांवड्यार केल्ली. मात, हें प्रकरण सध्या न्यायालयांत आशिल्ल्यान हाचेर चड उलोवपाक मेळचें ना. तरी, थळाव्यांच्या न्यायालयीन लढाये खातीर आपलें पुरायेन फाटबळ आसतलें, अशें आस्वासन तांणी दिलें. उपरांत हजर आशिल्ल्या सगल्यांनी काळो कपडो आनी सरकारा आड तक्टो हातांत घेवन निशेध केलो आनी गुन्यांव फाटीं घेवपाची मागणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
