भांगरभूंय | प्रतिनिधी
येणावळ खात्याची अधिसुचोवणी जारी
भू येणावळ नेमांत करतले बदल
हरकती नोंद करपाक 15 दिसांची मुजत
भांगरभूंय । प्रतिनिधी
पणजी : गोंय सरकारान 28 फेब्रुवारी 2014 आदलीं सरकारी जमनी वयलीं घरां नियमीत करचे खातीर भू येणावळ नेमांत (1971) बदल करपाचो निर्णय घेतला. तातूंत जमीन नियमीत करचे खातीर नेम आनी अटी, विहीत अर्जाचो नमुनो हांचो आस्पाव केला. मसुदो नेमां विशीं येणावळ खात्याक सुचोवण्यो दिवपाक वा हरकती नोंद करचे खातीर 15 दिसांची मुजत दिल्या.
मसुदो अधिसुचोवणे प्रमाण अर्जदाराक अर्जा वांगडा 100 रुपयांचो न्यायालयीन शुल्क स्टॅम्प वा विशेश अॅढेजिव्ह स्टॅम्प जोडचे पडटले. जमीन नियमीत करून घेतिल्ले व्यक्तीक ते जमनीचो वापर फक्त रावपाच्या घरा खातीर म्हणुनूच करपाक मेळटलो. अशी जमीन हेर खंयच्याच कारणा खातीर वापरपाक मेळची ना. घर नियमीत केले उपरांत ती जमीन वा तातूंतलो खंयचोच भाग फुडलीं 20 वर्सां मेरेन विकपाक, हस्तांतरीत करपाक मेळचो ना. ते व्यक्तीक 20 वर्सां भितर आपल्या घरच्यांक गिफ्ट स्वरुपांत जमीन दिवपाक मेळटली.
वयर सांगिल्ली खंयचीय अट मोडली जाल्यार ते व्यक्तीक जमनींतल्यान भायर काडटले. नियमीत जाल्ले जमनीचो ताबो उपजिल्होधिकारी घेतलो. जमीन नियमीत करपा खातीर दिल्ले सगलें शुल्क सरकार जप्त करतलें. अर्जदारान फटींचें प्रतिज्ञापत्र वा कागदपत्र सादर केलां, अशें कळ्ळ्यार नियमीत केल्लें घर वा दिल्ली जमीन सरकाराक परतून दिवची पडटली.
अश्या प्रकरणांत अर्जदाराक दोन वर्सां मेरेन बंदखण आनी एक लाख रुपया मेरेन दंडाची ख्यास्त जावपाक शकता. घरां नियमीत करचे खातीर उपजिल्होधिकाऱ्या कडेन अर्ज सादर करचो पडटलो. अर्जांत नांव, घराचो नामो, पंचायत वा नगरपालिका वाठार, सर्वे नंबर वा पीटी नंबर आनी सबडिव्हिजिनल नंबर क्षेत्रफळ, बांदकामाची तारीख, थळाव्या प्रशासनान जारी केल्लो घर तशेंच हेर नंबर, नियमितीकरण करचे खातीर अर्ज केल्ले सुवातेचें क्षेत्रफळ हाची म्हायती दिवची पडटली. तशेंच अर्जदाराक नेम 38 अ प्रमाण अर्ज करता, अशें बरोवन दिवचें पडटलें. तशेंच ताका आपले कडेन गोंयांत आनीक खंयच जमीन, घर, फ्लॅट, अपार्टमेंट वा वारसान मेळिल्ली मालमत्ता नाशिल्ल्याचेंय बरोवन दिवचें पडटलें. अर्जदाराक नियमीत करपाची आशिल्ली जमीन सेटलमेंट, संस्था, उद्देगीक, लागवड वा ऑर्डड वाठारांत येता हाचीय म्हायती दिवची पडटली. अर्जा वांगडा पुरावो म्हणून नगरपालिका, पंचायत वा म्हापालिकेन घराक दिल्ल्या नंबराचीं कागदपत्रां जोडचीं पडटलीं.
घर 28 फेब्रुवारी 2014 आदींचें आसा हाचो पुरावो म्हणून 10 परस अदीक तरेचीं कागदपत्रां दिवपाचो पर्याय दिला. तातूंत वीज, उदक बील, मतदार वळखपत्र, आधार कार्ड, पासपोर्ट, टेलिफोन बील, घरपटी भरिल्ल्याची पावती, बँकेचो वा पोस्टाचो पासबूक, खंयच्याय सरकारी खात्यान धाडिल्ली नोटीस वा पत्र, खंयचेय तरेचो कर भरिल्ल्याची पावती हांचो आस्पाव आसा.
15 वर्सांचो राबितो दाखलो गरजेचो
जमीन नियमीत करून घेवपी व्यक्ती 28 फेब्रुवारी 2014 आदीं 15 वर्सां गोंयांत राविल्ली आसपाक जाय. ते व्यक्ती कडेन 28 फेब्रुवारी 2014 आदलो 15 वर्सांचो राबितो दाखलो आसप गरजेचें आसा.
400 चौ. मि. मेरेनूच जमीन नियमीत
नव्या नेमा प्रमाण 400 चौखण मिटरां मेरेनची जमीन नियमीत करतले. अर्जदारान हाचे परस अदीक जमनीर अतिक्रमण केल्लें आसत जाल्यार ताका ती जमीन सरकाराक परतून दिवची पडटली. हे विशीं ते व्यक्तीक कसलोच दावो करपाक मेळचो ना. अर्जदाराक अर्जा वांगडा हे विशींचें प्रमाणपत्र दिवचें पडटलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
