भांगरभूंय | प्रतिनिधी
बंदर कप्तान खात्याच्या मॅरीटायम मास्टर प्लॅनांतल्यान म्हायती
भांगरभूंय । प्रतिनिधी
पणजी : गोंयांतल्यो 124 जेटी मदल्यो फक्त 28 टक्के जेटी हो सरकारी मालकीच्यो आसात, उरिल्ल्यो सगळ्यो जेटी खाजगी मालकीच्यो आसात. गोंयांतल्यो चडश्यो जेटी म्हालाचे येरादारी खातीर बांदल्यात जाल्यार दुसरे वळेरेर पर्यटना खातीर बांदिल्ल्या जेटींचो आस्पाव आसा, अशी म्हायती बंदर कप्तान खात्याच्या अहवालांतल्यान आयल्या.
दोनापावल सिदाद दे गोवा हांगासर घडोवन हाडिल्ले भारत मॅरीटायम सप्तकांत गोंय राज्याचो मॅरीटायम मास्टर प्लॅन मसुदो बंदर कप्तान खात्यान सादर केलो. ह्या मसुद्यांतल्यान ही म्हायती मुखार आयल्या.
गोंय राज्यांत 124 जेटी आसात, तातूंतल्यो 35 जेटी ह्यो सरकारी मालकीच्यो आसात, जाल्यार 89 जेटी ह्यो खाजगी मालकीच्यो आसात.
सरकारी मालकीच्या 35 जेटी मदल्यो 10 जेटी बंदर कप्तान खात्याच्यो, 16 न्हंय येरादीर खात्याच्यो, 7 नुस्तेमार खात्याच्या मालकीच्यो आनी 2 पर्यटन खात्याच्या मालकीच्यो आसात. जाल्यार 89 खाजगी जेटींचे धनी कोण हे विशींची म्हायती मसुद्यांत दिवंक ना. पूण हातूंतल्यो 48 जेटी काँक्रिटाच्यो, 6 जेटी लांकड्याच्यो आनी 35 उफेवपी जेटींचो आस्पाव आसा.
जेटीचे प्रकार
पोर्ट रिसेप्शन – 1
म्हाल येरादारी – 48
क्रूज – 52
नुस्तेमारी – 8
समुदायीक – 15
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
