भांगरभूंय | प्रतिनिधी
पणजीः हवामान खात्यान आयच्यान 15 सप्टेंबर मेरेन गोंयांत जोगलां सयत पावस पडपाची शक्यताय उक्तायलां. ते प्रमाण ह्या तीन दिसां खातीर पावसाचो येलो अलर्ट जारी केला. शेनवारा सकाळीं सावन हवामान ढगाळ आशिल्लें. दनपारां कांय वेळ मध्यम पावस पडलो. पावसाक लागून वातावरणांतली उश्णताय उणी जावन ओलसाण आयली.
गोंयांत 16 ते 19 सप्टेंबर ह्या काळांत मात्यो पावस पडपाची शक्यताय आसा. शेनवारा पणजेंत चडांत चड तापमान 31 अंश आनी उण्यांत उणें तापमान 25.4 अंश सेल्सिअस नोंद जाला. मुरगांवांत चडांत चड तापमान 31 अंश आनी उण्यांत उणें 25.6 अंश सेल्सिअस उरलें. फुडले स दीस राज्यांत चडांत चड तापमान 29 ते 30 अंश आनी उण्यांत उणें 24 अंश सेल्सिअस उरपाची शक्यताय आसा.
गोंयांत 1 जून ते 13 सप्टेंबर ह्या काळांत सरासरी 116.05 इंच पावस पडलो. अंदूं सरासरी परस 3.6 टक्क्यांनी चड पावस पडला. ह्या काळांत सांग्यार 153.72 इंच, धारबांदोड्यां 151.58 इंच, वाळपय 150 इंच, केपें 141.80 इंच, फोंडें 123.73 इंच, साखळे 119.28 इंच, पेडणें 113.50 इंच, काणकोणां 111.75 इंच, पोरणें गोंयां 110.06 इंच आनी म्हापशें 98 इंच पावसाची नोंद जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
