भांगरभूंय | प्रतिनिधी
नवी दिल्ली, खबरां संस्था ः देशांतले 21% खासदार, आमदार आनी विधान परिषदेचे वांगडी (एमएलसी) राजकी कुटुंबांतले आसात. राज्यां मदीं उत्तर प्रदेशांत राजकी कुटुंबांतले फुडारी सगळ्यांत चड आसात. हांगा 604 खासदार, आमदार आनी एमएलसींतले 141 (23%) राजकी कुटुंबांतले आसात.
महाराष्ट्र दुसरे सुवातेर आसा. हांगा 403 मदले 129 (32%) राजकी कुटुंबांतले आसात. ही म्हायती असोसिएशन फॉर डेमोक्रेटिक रिफॉर्म्सच्या (ADR) अहवालांत दिल्या. अहवाला प्रमाण एडीआरान 5 राज्यां/केंद्रशासित प्रदेश सोडून 4,092 सध्याचे खासदार, आमदार आनी एमएलसींतल्या 4,123 जाणांच्या प्रतिज्ञापत्रांची तपासणी केल्या.
काँग्रेसीचे 32% खासदार आनी 18% भाजपाचे खासदार राजकी कुटुंबांतले आसात. 2009, 2014, 2019 वर्साच्या तुळेंत गुन्यांवकारी फुडाऱ्यांचें प्रमाण सेगीत वाडत आसा अशें अहवालांतल्यान दिसून येता. अहवाला प्रमाण 28% बायलां खासदार आनी आमदारांनी आपल्या प्रतिज्ञापत्रांत गुन्यांवकारी खटले जाहीर केल्यात.
राष्ट्रीय पक्षां मदीं काँग्रेसीचे सध्याचे खासदार, आमदार आनी एमएलसीचे 32% राजकी कुटुंबांतले आसात. ताचे उपरांत भाजपा 18% आसा. जाल्यार सीपीआयांत 8% खासदार, आमदार आनी एमएलसी राजकी कुटुंबांतले आसात.
मजगतीं, लोकशायेचेर वंशपरंपरेन राजकारण आसा अशें एडीआर अहवालांतल्यान दिसून येता. वंशपरंपरेन राजकारणाचो देशाच्या राजकारणाचेर आनी लोकशायेचेर व्हड परिणाम जाता. जाका लागून नवे आनी सक्षम फुडाऱ्यांक मुखार सरपाची संद उणी जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
