नोटीस धाडून हात फांफुडपाचो प्रकार

भांगरभूंय | प्रतिनिधी

जुन्ता हावसांतल्या कर्मचाऱ्यां मदीं निरशेणेचो सूर

पणजी : सामान्य प्रशासन खात्यान जारी केल्ल्या आदेशाक लागून जुन्ता हावसांतल्या सरकारी कर्मचाऱ्यां मदीं निरशेणेचो सूर पातळ्ळा. उत्तर गोंयच्या जिल्होधिकाऱ्यान आपत्ती वेवस्थापन कायद्या खाला ही इमारत मोडून उडोवपाचो आदेश दिला, आनी विवीध सरकारी कार्यालयां स्थलांतरीत करपा खातीर नोटिसो जारी केल्यात. पूण ह्या इमारतींत अजुनूय कांय कार्यालयां कार्यरत आसात. देखून सामान्य प्रशासन खात्यान जुन्ता हावसांत काम करपी खात्यांक ही इमारत धोक्याची थारिल्ल्यान ती बेगोबेग रिकामी करपाचो आदेश दिला, आनी खंयच्याय अपघाताक सरकाराक जापसालदार धरपाचें ना, अशेंय स्पश्ट केला.

हे संबंदीं जुन्ता हावसांतल्या विवीध खात्यांच्या कार्यालयांक भेटी दिवन चवकशी केली. थंय काम करपी सरकारी कर्मचाऱ्यांनी सरकाराच्या ह्या निर्णया विशीं असमाधान उक्तायलां. खंयचोच कर्मचारी आपलो जीव घाताक घालून ह्या इमारतींत स्वेच्छेन भितर सरना. जुन्ता हावसांतलीं विवीध खातीं – कार्यालयां चड सोयीच्या सुवातींनी स्थलांतरीत करप हें सरकाराच्या सामान्य प्रशासन खात्याचें कर्तव्य आसा. तशें करचे बदला फक्त इमारतींतल्या खात्यांक नोटिसो धाडप म्हणल्यार आंग फांफुडपा भशेन जाता, अशेंय तांणी उलोवन दाखयलें.

सद्या जुन्ता हावसाच्या इमारतींतलीं कार्यालयां

लिफ्ट 1 ः 1) येरादारी संचालनालय, 2) भुरगीं उदरगत प्रकल्प अधिकाऱ्यांचें कार्यालय, 3) नागरी पुरवण आनी गिरायक वेव्हार खातें. 4) गोंय राज्य गिरायक वाद निवारण आयोग, 5) राजभाशा संचालनालय, 6) स्वामी विवेकानंद सोसायटी.

लिफ्ट 2 ः गोंय खादी उद्देग आनी ग्रामोद्देग मंडळ.

लिफ्ट 3 ः गोंय राज्य बायलां आयोग

लिफ्ट 4 ः 1) गट विकास अधिकारी तिसवाडी कार्यालय, 2) सहाय्यक अभियंतो कार्यालय उपविभाग II, काम विभाग II, भौशीक बांदकाम खातें, 3) जिल्हो निबंधक कार्यालय (उत्तर गोंय) आनी संस्था म्हानिरिक्षक, 4) कार्यकारी अभियंतो कार्यालय काम विभाग Il (रस्ते), भौशीक बांदकाम खातें, 5) सहाय्यक अभियंतो कार्यालय उप विभाग IV. काम विभाग I (इमारत) भौशीक बांदकाम खातें, 6) कार्यकारी अभियंतो, कार्यालय काम विभाग I (इमारत), भौशीक बांदकाम विभाग. वट्ट 14 कार्यालयां आसात. तशेंच ह्या इमारतीच्या तळ माळ्यार एक हॉटेल, दोन गादयो विकपी दुकानां, मोबायल विक्री दुकान, गोवा सहकार भंडाराचें भाजी आनी फळाचें विक्री दुकान सद्या चालू आसात.

एका खाजगी दुकानाच्या धनयाक विचारलें तेन्ना आमी रोखडेच दुकानां खाली करपाचे आसात. तशेंच गोवा सहकार भंडाराक पणजेंत सुवात मेळटकूच तांचे स्थलांतर रोखडेंच जावपाचे आसा.

खात्यांचीं कांय कार्यालयां आल्तिनो वेल्या सरकारी क्वार्टर्सांनी स्थलांतरीत करतले, जाल्यार कांय पणजीच्या पोरण्या विक्री कर इमारतींत हालयतले. हे इमारतीची वायट स्थिती आसा अशें कांय जाण म्हणटात, देखून कांय अधिकारी आनी कर्मचाऱ्यांनी पयलीं ह्या इमारतींत वच्चें न्हय असो विचार केल्लो. पूण विक्री कर भवन (पोरणी इमारत) हांगां कांय दुरुस्ती कामां केल्या उपरांत जुन्ता हावसांतलीं 4-5 कार्यालयां थंय स्थलांतरीत करतले. जाल्यार 2-3 कार्यालयां खाजगी इमारतींत व्हरपाचो विचार चल्ला.

कांय कार्यालयां खातीर हेर सुवातींनी ऑफीस फर्निचराचें काम चालू आशिल्ल्यान तीं कार्यालयां पुराय जातकच स्थलांतरीत जातलीं.

सध्या जुन्ता हावस इमारतींत आशिल्ल्या कार्यालयांची स्थिती सामान्य प्रशासन खात्याक खबर आसली तरी तांणी अशी नोटीस धाडून हात वयर केल्यात. कर्मचाऱ्यां मदीं मात ह्या नोटिसांक लागून असंतोशाचो सूर दिसता.