भांगरभूंय | प्रतिनिधी
चिंतन – 37
तुकोबा म्हणटात –
निवडावें खडे ।
तरी दळणा वोजें घडे ॥
नाहीं तरि नासोनि जाय ।
कारण आळस उरे हाय ॥
जर धान्यांतल्यान फातर, कुपादर वेंचून काडल्यारच दळण बरें दळटा. कुपादर काडले नात जाल्यार दळिल्लें पिठूय फुकट वता आनी ते वापरून केल्ल्या चपाती वा भाकरेंत फातर मेळटकच हाय हाय करपाचो वेळ येता. हाका कारण म्हणल्यार आमचो आळस.
ही शिकवण आमच्या जिवितांत आमकां कशी लागू जाता? फकत धान्यांतले फातर वेंचून काडप न्हय, तर आमच्या दरेका कामांतल्यान गरजे भायल्यो गजाली काडून उडोवप म्हत्वाचें. चड करून आमी एक काम सुरू करतात, पूण तातूंत जायत्यो गरजे भायल्यो गजाली आस्पावतात, जाका लागून तें काम पुराय करपाक चड वेळ लागता आनी ताचो परिणामूय समाधानकारक नासता.
शेखर हो एक खूब हुशार आनी कश्ट करपी मनीस. पूण, म्हायती गरजेची नासली तरी दरेका कामांत चड म्हायती एकठांय करपाची ताका संवय आशिल्ली. ताका लागून ताच्या प्रकल्पाचो वेळ वाडलो आनी तो वेळार पुराय जालो ना. ताच्या बॉसान ताका समजायलें, “आमी दरेका कामांतल्या म्हत्वाच्या गजालींचेर लक्ष केंद्रीत करचें, गरजे भायल्या गजालींचेर वेळ घालोवन आपलोच वेळ फुकट वता.”
हाचो विचार करून ताणें आपली कामाची पद्दत बदलली. गरजे भायर गजाली कुशीक दवरून ताणें म्हत्वाच्या कामांचेर लक्ष केंद्रीत केलें. ताका लागून ताका आपलें काम वेळार पुराय करपाक मेळ्ळें आनी ताका यशूय मेळ्ळें.
हें आमकां आमचे दिसपट्ट्या जिणेंत लागू जाता. आमी खूबदां आमचो वेळ आनी उर्जा गरजे भायल्या गजालींचेर वगडायतात. देखीक, सोशल मिडियाचेर चड वेळ घालोवप, गरजे भायर चकाटां मारप वा आमच्या नियंत्रणा भायर आशिल्ल्या गजालींचो हुस्को करप. हे सगळे आमच्या जिवितांतले ‘फातर, कुपादर’, जे आमकां मुखार वचपाक आडायतात. जिणेंत येसस्वी जावपाक जाय जाल्यार आमच्या वावरांतल्यो गरजे भायल्यो गजाली कुशीक दवरून म्हत्वाच्या गजालींचेर लक्ष केंद्रीत करपाची गरज आसा. तेन्नाच आमी येसस्वी जातले.
तर, आमच्या जिवितांतले ‘फातर’ वेंचून काडूया आनी आमच्या जिविताक नवी दिका दिवया.
– ह भ प देवदत्त दिगंबर परुळेकर
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
