भांगरभूंय | प्रतिनिधी
डॉ. सावंत : समन्वय नासल्यार गुन्यांवकार सुट्टात
भांगरभूंय । प्रतिनिधी
पणजी : पिडितांचो त्रास उणो जावपा सयत गुन्यांवकार सुटपाक जायना जाल्यार पुलीस, वकील आनी हेर संबंदितां मदीं समन्वय आसपाक जाय. समन्वय नासलो जाल्यार गुन्यांवकार सुट्टात. गुन्यांवकार सुटले उपरांत पुलीस वकिलांक जाल्यार वकील पुलिसांक दोश दितात, अशें मुख्यमंत्री डॉ. प्रमोद सावंत हांणी सांगलें. चवकशी वा तपास योग्य तरेन जावन गुन्यांवकार सुटपाक जायना, म्हूण कायद्या विशीं प्रशिक्षण दिवप गरजेचें थारता, अशेंय तांणी म्हणलें.
तीन नव्या कायद्या विशीं पुलीस, वकील आनी फॉरेन्सीक अधिकाऱ्यांक प्रशिक्षण दिवपी कार्यावळ जाली. तिनूय खात्यांचे मेळून 65 अधिकाऱ्यांक प्रशिक्षण दिलें. प्रशिक्षण कार्यावळीच्या समारोप सुवाळ्याक मुखेल सोयरे म्हूण मुख्यमंत्री हाजीर आशिल्ले.
भारतीय न्याय संहिता (बीएनएस), भारतीय नागरीक सुरक्षा संहिता (बीएनएसएस) आनी भारतीय साक्ष अधिनियम हे तीन नवे कायदे लागू जाल्यात. पिडितांक थाकाय मेळची, गुन्यांवकारांक ख्यास्त जावची आनी कायदो, सुवेवस्था उरची हो हेतू हाच्या फाटल्यान आसा. ब्रिटीश राजवटी सावन देशांत भारतीय दंड संहिता (आयपीसी), फौजदारी दंड संहिता (सीआरपीसी) आनी इंडियन एविडन्स अॅक्ट हे तीन कायदे आशिल्ले. न्याय वेवस्थेंत सुदारणा करपा खातीर सरकारान कायद्यांत बदल केलो. नव्या कायद्यांचे कार्यवाही खातीर पुलीस तशेंच हेर संबंदितांक प्रशिक्षण दिवप गरजेचें थारता. आतां ज्या अधिकाऱ्यांनी प्रशिक्षण घेतलां तांणी खात्याच्या हेर संबंदितां मेरेन प्रशिक्षणांतल्यान मेळिल्लें ज्ञान पावोवप गरजेचें आसा, अशें मुख्यमंत्री डॉ. प्रमोद सावंत हांणी सांगलें.
गोंय पुलीस – योस्का अॅपाचो शुभारंभ
पुलिसांचे तंदुरुस्ती खातीर गोंय पुलीस – योस्का अॅपाचो शुभारंभ मुख्यमंत्र्यां हस्तुकीं जालो. लोकांक बरी सेवा दिवपा खातीर पुलिसांनी तंदुरुस्त रावप गरजेचें थारता. तंदुरुस्ती खातीर अॅपाचो योग्य तरेन वापर पुलिसांनी करचो, अशें मुख्यमंत्र्यान ह्या वेळार म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
