भांगरभूंय | प्रतिनिधी
हेल्थवे हॉस्पिटल वेवस्थापनान केली निलंबनाची कारवाय
भांगरभूंय । प्रतिनिधी
पणजी : हेल्थवे हॉस्पिटलांतल्या एके विदेशी महिला दुयेंतीचेर लैंगीक अत्याचार केल्ल्या प्रकरणांत डॉ. व्ही. दोशी ह्या प्रशिक्षणार्थी दोतोराक अटक केल्या. 31 ऑगस्टाक ही घडणूक घडिल्ली, जाल्यार 10 सप्टेंबराक पिडितेचे भयणीन कागाळ दाखल केले उपरांत ही कारवाय केली.
पुलिसांनी दिल्ले म्हायती प्रमाण, मूळ सोलापूर, महाराष्ट्राचो आशिल्लो डॉ. वृषभ दोशी हाणें हेल्थवे हॉस्पिटलाच्या अतिदक्षता विभागांत उपचार घेवपी मोरोक्कन बायलेचेर लैंगीक अत्याचार केलो. दुबावितान बायलेचे असहाय्यतेचो आनी गंभीर स्थितीचो गैरफायदो घेतलो. घडणुके उपरांत तो गोंयांतल्यान पळून गेल्लो. ते उपरांत पुलिशेच्या एका विशेश पंगडान ताका सांगलींतल्यान अटक केली. ताचेर भारतीय न्याय संहिता कलम 64(2)(ई) आनी हेर कलमां खाला गुन्यांव दाखल केला. हे घडणुके उपरांत हॉस्पिटल वेवस्थापनान तत्काळ डॉ. दोशी हाका निलंबीत केला. हेल्थवे हॉस्पिटलान पिडीत बायलेक पुलिशेंत कागाळ नोंद करचे खातीर सगले तरेची मजत करपाचें उतर दिलां. सध्या ती बायल हॉस्पिटलांत उपचार घेता. ह्या कठीण काळांत तिका सगली नैतीक आनी गरजेची मजत दीस रावपाची हमी हॉस्पिटल प्रशासनान दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
