भांगरभूंय | प्रतिनिधी
मुख्यमंत्री डॉ. प्रमोद सावंत हांची म्हायती
बिट्स पिलानींत वर्सभरांत 5 विद्यार्थ्यांक मरण
कथीत ड्रग्स वेव्हाराची चल्ल्या चवकशी
भांगरभूंय । प्रतिनिधी
पणजी : बिट्स पिलानींत विद्यार्थ्याच्या मरणाचो तपास चालू आसा, अशें मुख्यमंत्री डॉ. प्रमोद सावंत हांणी सांगलें. बिट्स पिलानी कॅम्पसांत घुंवळे वखदांचो वेव्हार चलता काय क्तें, ताचो लेगीत तपास चालू आसा, अशें तांणी सांगलें. मजगतीं पुराय प्रकरणाची न्यायालयीन चवकशी करपाची मागणी काँग्रेसीन केल्या. आम आदमी पक्षान लेगीत या प्रकरणाची खोलायेन चवकशी जावपाची मागणी केल्या.
बिट्स पिलानीच्या गोवा कॅम्पसांत वर्सभरात 5 विद्यार्थ्यांक मरण आयलां. फाटल्या सप्तकांत ऋशी नायर ह्या विद्यार्थ्याक मरण आयिल्ल्यान शिक्षण वाठारांत खवदळ पडला. पुलिसां कडल्यान तपास चालू आसतानाच विद्यार्थ्याच्या रॅंडोक्स चांचणेंत घुंवळे वखदांचे अंश मेळ्ळ्यात. हीं घुंवळीं वखदां विद्यार्थ्याच्या पोटांत पावली कशी? असो प्रस्न निर्माण जाला. घुंवळी वखदां भलायकेच्या वखदांतल्यान पावलीं काय विद्यार्थ्यान घुंवळी वखदां घेतिल्लीं, असो प्रस्न आतां निर्माण जाला. बिट्स पिलानीच्या कॅम्पसांत घुंवळी वखदांचो वेव्हार चलता अशी चर्चा सुरू जाल्या. घुंवळी वखदांच्या वेव्हारांचो तपास चालू आसा, अशें मुख्यमंत्री डॉ. प्रमोद सावंत हांणी स्पश्ट केलें.
विद्यार्थ्यांन ड्रग्स कोणा कडल्यान खरेदी केल्लो?
बिट्स पिलानी कॅम्पसांत वर्सभरांत पांच विद्यार्थ्यांक मरण आयलां. तातूंत पोटांत घुंवळी वखदां मेळपाची ही पयलीच घडणूक आसा. ह्या विद्यार्थ्यान घुंवळी वखदां केन्ना आनी कोणा कडल्यान खरेदी केल्ली? हाचो तपास चालूरू आसा, अशी म्हायती दक्षीण गोंय पुलीस अधिक्षक टिकमसिंग वर्मा हांणी दिली.
हे घडणूके उपरांत पुलिसांनी उंचेल्या शिक्षण संस्थेच्या वाठाराचेर खर नदर दवरपाक सुरवात केल्या, अशें तांणी सांगलें.
वेवस्थापना आड गुन्यांव नोंद करात : काँग्रेस
विद्यार्थ्यांच्या मरण प्रकरणांत बिट्स पिलानी, गोंय कॅम्पसाच्या वेवस्थापना आड गुन्यांव नोंद करपाची मागणी काँग्रेसीन केल्या. हे विशीं काँग्रेस विधी मंडळ फुडारी युरी आलेमांव आनी प्रदेश अध्यक्ष अमीत पाटकार हांणी पत्रक जारी करून ही मागणी केली. गोंय पुलिसांनी ह्या प्रकरणाची खोलायेन चवकशी करपाची गरज आसा, अशें युरी आलेमाव हांणी म्हणलें. विद्यार्थ्याच्या मरण प्रकरणांत न्यायालयीन चवकशी करपाची मागणी प्रदेश कॉंग्रेस अध्यक्ष अमीत पाटकार हांणी केल्या. उच्च शिक्षण संस्थांच्या विद्यार्थ्यांचे मानसीक भलायकेचें ऑडीट करपाचीय मागणी तांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
