भांगरभूंय | प्रतिनिधी
हायकोर्ट : स सप्तकां भितर व्याजा सयत पेन्शन दिवपाचो आदेश
पणजी : गोंयच्या मुंबय उच्च न्यायालयान एक म्हत्वाचो निर्णय घेतलो. तांणी म्हणलें, खंयच्याय कर्मचार्यांची पेन्शन फकत तांचेर सुरू आशिल्ल्या फौजदारी खटल्यांक लागून आडावपाक मेळना. विशेश म्हणल्यार जर संबंदीत खटल्याचो ताच्या अधिकृत कर्तव्या कडेन कसलोच संबंद नासल्यार पेन्शन आडावप कायद्याचे नदरेन अयोग्य आसा, निवृत्त सहायक उपनिरीक्षक गुरुदास शिवा नायक हांच्या प्रकरणांत हो निर्णय दिला.
31 मे 2024 दिसा सेवानिवृत्त जाले उपरांत गुरुदास नायक हांचेर दिवचल पुलीस स्टेशनांत दाखल आशिल्ल्या एका गुन्यांवाक लागून तांकां फकत तात्पुरतें पेन्शन मंजूर केल्लें. हो गुन्यांव तांच्या अधिकृत कर्तव्या कडेन संबंदीत नाशिल्लो, असो युक्तिवाद तांचे वकील अॅड. दीपक गांवकार हांणी केलो.
हाचेर सुनावणी करतना उच्च न्यायालयान म्हणलें, पेन्शन आडावपाक संबंदीत विभागा कडल्यान लागू केल्लो ‘सीसीएस (पेन्शन) नियम 8’ हो फकते तेन्नाच लागू जाता, जेन्ना कर्मचार्यान आपल्या अधिकृत कर्तव्या मजगतीं वायट वागणूक वा गुन्यांव करता.
न्यायालयान गोवा सरकाराक आदेश दिले की, गुरुदास नायक हांकां तांची सगली पेन्शन आनी पेन्शनाचे हेर लाव आठ सप्तकां भितर फारीक करचे. तशेंच, कळाव जाल्ल्या पेन्शनाचेर 6 टक्के व्याजा सयत रक्कम दिवची
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
