भांगरभूंय | प्रतिनिधी
प्रधानमंत्री मोदी हांच्या वाडदिसा 17 सप्टेंबराक आयोजन
भांगरभूंय । प्रतिनिधी
दिवचल : प्रधानमंत्री नरेंद्र मोदी हांच्या वाडदिसा निमतान भाजप युवा मोर्चा दिवचले युवा रन मॅरथोन घडोवन हाडटले. हे मॅरथोना वरवीं फीट इंडिया आनी नशा मुक्त भारताचो संदेश दितले. देशभर जावपी ही मॅरथोन ही एक संवसारीक विक्रम करतली, अशें भाजप युवा मोर्चाचे अध्यक्ष समीर मांद्रेंकार हांणी सांगलें.
भाजपाच्या कार्यालयांत आपयिल्ले पत्रकार परिशदेंत समीर मांद्रेंकार उलयातले. ह्या वेळार करिना शिरोडकार आनी हेर फुडारी हाजीर आशिल्ले.
17 सप्टेंबराक ही मॅरथोनाची सुरवात दिवचलेच्या नव्या बायपास रस्त्याचेर जातली आनी दिवचल कदंब बसस्टॅण्डार ती सोंपतली. मॅरथोनाचें हें अंतर पांच किलोमिटर आसा. 5 ते 17, 18 ते 25, 26 ते 60 आनी 60 वर्सां परस अदीक पिराय अश्या पांच गटांनी ही मॅरथोन जातली. सकाळीं 5 वरांचेर स्पर्धकांनी पेन सर्कला कडेन हाजीर रावचें. 5.45 वरांचेर मॅरथोनाक सुरवात जातली, अशी म्हायती मांद्रेंकार हांणी दिली. ह्या मॅरथोनांत मुख्यमंत्री डॉ. प्रमोद सावंत, भाजप प्रदेशाध्यक्ष दामू नायक, मंत्री आनी आमदार वांटो घेतले. ही मॅरथोन गोंया सयत देशांतल्या 75 वाठारांनी जावपाची आसा. सगल्या वाठारांनी मॅरथोन सोंपले उपरांत प्रधानमंत्री नरेंद्र मोदी मॅरथोनांत वांटो घेतिल्ल्यांक लायव्ह संबोधीत करतले. ही मॅरथोन गिनीज बुकांत वर्ल्ड रिकॉर्ड म्हूण नोंद जातली, अशी खात्री आसा, अशें मांद्रेंकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
