भांगरभूंय | प्रतिनिधी
कोयर वेवस्थापन मंडळाक निवेदन सादर
भांगरभूंय । प्रतिनिधी
म्हापशें : साळगांवच्या घन कोयर प्रक्रिया प्रकल्पा भोंवतणी बफर झोनाचो विस्तार करचे खातीर गोंय कोयर वेवस्थापन म्हामंडळान (जीडब्ल्यूएमसी) साळगांव कोमुनिदादी कडेन अदीक जमीन संपादीत करपाचो प्रस्ताव दवरला. प्रकल्पा खातीर ही अतिरिक्त जमीन मेळोवपाक काँग्रेसीच्या साळगांव आनी कळंगूट गट समितीन विरोध केला.
बुधवारा 10 सप्टेंबराक काँग्रेसीचे उत्तर गोंय जिल्होध्यक्ष विरेंद्र शिरोडकार आनी साळगांव गट अध्यक्ष अतुल नायक हांच्या फुडारपणा खाला साळगांव आनी कळंगूट गट समिती वतीन कोयर वेवस्थापन म्हामंडलाच्या अधिकाऱ्यांची भेट घेतली आनी बफर झोन विस्तार येवजणेक विरोध करपी निवेदन सादर केलें.
गट अध्यक्ष अतुल नायक हांणी सांगलें, कोयर वेवस्थापन म्हामंडळा कडल्यान साळगांव कोमुनिदादीक पत्र आयलां आनी बफर झोना खातीर जमीन दिवपाची विनवणी तातूंत केल्या. पूण ही जमीन कोयर प्रकल्पाच्या (जीटीपी) फुडल्या विस्तारा खातीर वापरचे ना, हाची हमी कितें? बफर झोनाच्या नांवा खाला हो लोकांच्या दोळ्यांक उदक लावपाचो प्रकार आसा, असो आरोप तांणी केला.
साळगांव पंचायतीन हे आदींच जमीन संपादनाक विरोध केला. कोमुनिदादीच्या गांवकारांनी लेगीत कोयर प्रकल्पाक आनीक जमीन दिवपाक विरोध केला. जेन्ना कोयर प्रकल्प उबारिल्लो तेन्ना ताची तांक 100 टन आशिल्ली आनी ती फक्त बार्देसा खातीर आसपाक जाय आशिल्लो. पूण आतां मुरगांव, फोंडें आनी हेर म्हालांतलो कोयर हाडटात. प्रकल्पाची तांक 250 टनां मेरेन वाडयल्या, अशें नायक हांणी सांगलें. नायक हांणी सांगलें, साळगांव, कळंगूट, कांदोळी आनी पिळर्ण गांवांतले लोक ह्या कोयर प्रकल्पाच्या विस्ताराक विरोध करतात. तशेंच नियोजीत बफर झोना संबंदांत कसलीच स्पश्टता ना. प्रकल्पाच्या अधिकाऱ्यांच्या मतान कोयर प्रकल्पा भोंवतणी बफर झोन हो 200 ते 500 मिटर आसतलो. म्हणजेच गांवचो व्हड भाग कोयर प्रकल्पांत वतलो. ते उपरांत गोंयांतलो सगलो कोयर हांगा हाडटले. सध्या प्रकल्पांतल्यान मारपी घाण सोंसूंक जायना. ते खातीर लोकांक कोयर प्रकल्पाची तांक वा कोयर व्हरपी गाडयांची वाड नाका, अशें तांणी सांगलें.
हो जमीन घोटाळोच : काँग्रेस कार्यकर्तो
कोमुनिदादीची जमीन ताब्यांत घेवपाचो हो घोटाळो आसा. फाटल्या आयतारा जाल्ले साळगांव कोमुनिदादीचे बसकेंत हाजीर आशिल्ल्या 95 टक्के गांवकारांनी हे जमीन संपादन येवजणेक विरोध केलो, पूण वेवस्थापन समितीन हे येवजणेक विरोध करपी थाराव पारीत करपाक न्हयकार दिलो, असो आरोप एका काँग्रेस कार्यकर्त्यान केलो.
तांक वाडोवपाची येवजण ना : चव्हाण
कोयर प्रक्रिया प्रकल्पाची (जीपीटी) तांक वाडोवपाची कसलीच येवजण ना. प्रकल्पाची तांक 250 टन आसा आनी बफर झोन उणो आसा. पर्यटन मोसमांत कोयर वाडटा, अशें गोंय घन कोयर वेवस्थापन म्हामंडळाचे म्हावेवस्थापक दिग्विजय चव्हाण हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
