भांगरभूंय | प्रतिनिधी
रमेश तवडकार : कला अकादमीच्या सर्तींची इनामां भेटयलीं
भांगरभूंय । सांस्कृतीक प्रतिनिधी
पणजी : आमचो गोंय प्रदेश हो पर्यटकांचे नदरेन सूर्याचें वत, दर्यादेगो आनी रेंव इतले पुरतोच वळखुपाक जायना, जाल्यार गोंयच्यो गिरेस्त कला, संस्कृती हांणी भरिल्लें गोंय, सांस्कृतीक गोंय म्हूण वळखुचें, हे खातीर थळाव्या कलाकारांनी जापसालदारकी घेवची, असो उलो कला आनी संस्कृती मंत्री रमेश तवडकार हांणी बुधवारा मारलो. कला संस्कृती संचालनालयाच्या माध्यमांतल्यान खूबशे उपक्रम हाचे मुखार बरे पद्दतीन चालीक लागतले हाचेर लक्ष दितले, अशीय हमी तांणी दिली.
कला अकादमी आयोजीत राज्य कला प्रदर्शन (कलाकार आनी विद्यार्थी गट), विद्यालयीन आनी म्हाविद्यालयीन एकांकी सर्त, मराठी अ गट आनी ब गट नाटक सर्त तशेंच कोंकणी नाटक सर्तीच्या इनामां भेटवण सुवाळ्यांत तवडकार मुखेल सोयरे म्हूण उलयताले.
ह्या वेळार मानाचे सोयरे म्हूण उत्तर गोंय जिल्हो पंचायतीचे अध्यक्ष धाकू मडकयकार, कला अकादमीचे वांगडी सचीव शंकर गांवकार, कार्यावळ विकास अधिकारी प्रदीप गांवकार माचयेर हाजीर आशिल्ले. कार्यावळ अधिकारी संजीव झर्मेंकार हांणी सुत्रसंचालन केलें. प्रमाणपत्रांचें वाचन सहाय्यक निर्मिती वेवस्थापक प्रेमानंद पोळे, सहाय्यक वॉर्ड़्रॉप इन्चार्ज प्रभारी संजय गांवकार, कनिश्ठ सांस्कृतीक सहाय्यक विशांत गावडे आनी प्रणिता म्हार्दोळकार हांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
